Azərbaycan, Bakı, 18 yanvar /Trend/
Ermənistan üçün Rusiya qazının qiyməti ilə bağlı yekun qərar qəbul edilib: aprelin 1-dən "Qazprom" Ermənistana 1000 kubmetr qazı hazırkı 180 dollar əvəzinə 240 dollara satacaq. Trend-in məlumatına görə, bu barədə "Armenian Report" "Joxovurd" qəzetindəki məlumatlı mənbəyə istinadən xəbər verib.
"Bizdə olan məlumata görə, müvafiq müqavilə artıq hazırlanıb, yalnız onun rəsmən dərc olunması qalır. Hər şeydən göründüyü kimi, müqavilə artıq Ermənistanda prezident seçkilərindən dərhal sonra dərc olunacaq", - qəzet yazır.
Məlumata əsasən, şayiələrə görə, qazın qiymətlərinin bahalaşmasının nəticələri müvəqqəti olaraq "ArnRosqazprom"un yüksək mənfəəti hesabına yumşaldılacaq, çünki Ermənistanla sərhəddə qaz 180 dollara alınır, əhaliyə isə 340 dollara satılır.
"Amma artıq prezident seçkilərindən bir neçə ay sonra qazın qiyməti istehlakçılar üçün də bahalaşacaq. Lakin Ermənistanın Energetika Nazirliyi qaz tarifləri planında hələlik heç bir konkretləşdirmənin olmadığını, danışıqların isə hələ başa çatmadığını israr etməkdə davam edir", - "Joxovurd" yazır.