Azərbaycan, Bakı, 6 iyul /Trend, müxbir M.Əliyev/
"Eurovision 2012" mahnı müsabiqəsində fərqlənən könüllülər mükafatlandırılacaq. Bu barədə cümə günü Trend-ə Gənclər və İdman Nazirliyindən məlumat verilib.
"Eurovision 2012"-də Bakı şəhərində fəaliyyət göstərən ali təhsil müəssisələrindən min nəfərə yaxın tələbə könüllülər qrupunda təmsil olunmaq üçün seçilmişdilər.
Könülllər 4 aparıcı təşkilatın - Azərbaycan Tələbə Gənclər Təşkilatları İttifaqının, "İrəli" İctimai Birliyinin, Gənclər Təşkilatları Milli Şurasının və Kreativ Gənclər Birliyinin xətti ilə, eləcə də sərbəst şəkildə edilmiş müraciətlər əsasında müsabiqəyə qatılmışdılar. Könüllü qismində ali təhsil müəssislərinin tələbələri ilə yanaşı, müxtəlif müəssisələrdə, şirkətlərdə çalışan şəxslər də qatılmışdılar.
Gələcək işlərinə stimul olmaq məqsədilə nazirlik iyulun 7-də "Buta Palace"da könüllülər üçün əyləncəli gecə və sertifikatların təqdimetmə mərasimini təşkil edəcək. Mərasimdə gənclər və idman naziri Azad Rəhimov, Heydər Əliyev Fondu, Prezident Administrasiyasının və digər dövlət rəsmilərinin iştirakı nəzərdə tutulub.