Azərbaycan, Bakı, 11 noyabr /Trend/
Dekabrın 1-də Londonun "Sotheby's" hərrac evində Rusiya incəsənətinin üç sənət əsrini əhatə edən əsərlərdən ibarət satışlar baş tutacaq.
Trend Mədəniyyət və Turizm Nazirliyinə istinadən məlumat verir ki, hərracın əsas lotları arasında Azərbaycanın və SSRİ-nin xalq rəssamı, Rusiya Rəssamlıq Akademiyasının vitse-prezidenti Tahir Salahovun "Aydan" əsəri də yer alıb. Sənət əsəri 250-350 min funt sterlinq dəyərində qiymətləndirilir.
"Sotheby's" hərrac evinin məlumatında bildirilir ki, "Aydan" sovet dövrünün ən yaxşı əsərlərindən biri hesab olunur: "Bu rəsmin digər versiyası Rusiya Dövlət Tretyakovski Qalereyasında saxlanılır. Satışa çıxarılan variantı isə rəssam vaxtilə Tokioda açdığı sərgisi münasibətilə çəkib. "Aydan" əsəri sovet uşaqlığının ən gözəl təsviridir. Təsadüfi deyil ki, 2011-ci ildə Rusiyada üzərində bu rəsm əsərinin olduğu poçt markaları buraxılıb".