Azərbaycan, Bakı, 25 noyabr / Trend , müxbir K.Zərbalıyeva/ Azərbaycanda həbsxanada feldşer vəzifəsində çalışan ədliyyə işçisinin üzərindən narkotik maddə aşkarlanıb.
Ədliyyə Nazirliyinin Penitensiar Xidmətinin ictimaiyyətlə əlaqələr mərkəzindən çərşənbə axşamı Trend -a verilən məlumata görə, noyabrın 24-də təxminən saat 10.30 radələrində Penitensiar Xidmətin həbsxanasının əməliyyat aparatı işçiləri tərəfindən həyata keçirilən axtarış-baxış tədbiri zamanı Qobustan həbsxanasında feldşer vəzifəsində çalışan Ədliyyə Nazirliyinin Tibb Baş İdarəsinin əməkdaşı, tibb xidməti giziri Namiq İmran oğlu Babayevin üzərindən və ayaqqabısının içərisindən 50 ədəd dərman həbləri və 13,43 qram çəkidə olan narkotik maddə - qurudulmuş marixuana aşkar edilərək götürülüb. Babayev 2006-cı ildən ədliyyə orqanlarında xidmət edir.
Babayevin narkotik maddəni məhkumlardan birinə ötürmək üçün həbsxanaya keçirdiyi bildirilir.
Feldşer barəsində Qaradağ rayon Prokurorluğunda Cinayət Məcəlləsinin qanunsuz olaraq narkotik vasitələri, psixotrop maddələri və ya prekursorları əldə etmə, saxlama, hazırlama, daşıma (234) və vəzifə səlahiyyətlərindən sui-istifadə etmə (308) maddələri ilə cinayət işi açılıb.
Babayevin cinayəti sübut olunarsa, ədliyyə orqanlarından qovulacaq.
Məqalə müəllifi ilə əlaqə ünvanı:[email protected]
