Təfərrüatlar əlavə edilib (İlk xəbər 16:40-da yayılıb)
Azərbaycan, Bakı, 23 may /Trend, müxbir İ.İzzət, İ.İsabalayeva/
Qobustanda Oksford məktəbinin şagirdlərindən 1-nin ölməsi, 2-nin xəsarət alması ilə nəticələnən hadisənin təfərrüatları bəlli olub.
Qobustan rayon Təcili Tibbi Yardım Xidmətindən Trend-ə verilən məlumata görə, hadisə Qobustanda "Cənnət bağı" adlanan əyləncə və istirahət mərkəzində qeydə alınıb.
Hadisə bu gün saat 13:00 radələrində baş verib və əraziyə təcili yardım briqadası çağırılıb.
Əraziyə əylənməyə gələn uşaqlar orada maşın sürərkən o, qəfildən aşıb. Nəticədə 1 şagird ölüb, 2 şagird isə yaralanıb. Hadisə nəticəsində ölən və yaralananlar 10-11 yaşlı qızlar olub. Maşın aşan zaman onun içində müəllimə də olub. Lakin müəllimə xəsarət almayıb.
Uşaqlardan biri çiynindən zədə alıb.
Hadisə baş verərkən ərazidə əylənmək üçün 30-35 şagird olub.
Ərazidəki təcili tibbi yardım briqadasının işçiləri yaralanan məktəblilərə ilkin tibbi yardım göstəriblər.
Faktla bağlı Qobustan rayon prokurorluğunda araşdırma aparılır.