Azərbaycan, Bərdə, 12 iyun/ Trend , müxbir Ş.Cəliloğlu/ Ermənistan Silahlı Qüvvələri iyunun 11-i gecə saatlarından başlayaraq Azərbaycanın işğal olunmuş ərazilərində yenidən geniş miqyaslı yangınlar törətməyə başlayıb.
Trend -un arayışı: Azərbaycan Ekologiya və Təbii Sərvətlər Nazirliyinin ötən həftə yaydığı məlumata görə, bu il ermənilərin törətdiyi yanğınlar nəticəsində Azərbaycanın Ağdam və Füzuli rayonlarının işğal altında olan ərazilərində ətraf mühitə 39 208 manat dəyərində ziyan dəyib. Ağdam rayonunun işğal altında olan Soltanlı, Nəmirli, Novruzlu, Sarıcalı kəndlərində 20 hektardan çox ərazidə erməni işğalçıları tərəfindən yanğınlar törədilib. Ağdam rayon Ekologiya və Təbii Sərvətlər şöbəsinin mütəxəssisləri tərəfindən aparılan araşdırmalar zamanı torpağın üst münbit qatının yanması nəticəsində ətraf mühitə 22000, bitki örtüyünə 2200, atmosfer havasına isə 1084 manat ziyan dəydiyi müəyyənləşdirilib. Ümumilikdə, Ağdam rayonu üzrə ətraf mühitə 25284 manat ziyan vurulub.
Füzuli rayonunun Aşağı Seyidəhmədli, Qorqan və Horadiz kəndlərində ermənilər tərəfindən tərədilən yanğınlar zamanı 120 hektar sahədə bitki örtüyü və torpağın üst münbit qatı tamamilə yanıb, atmosferə xeyli miqdarda zərərli maddələr atılıb və ərazidəki fauna növləri yanaraq məhv olub. Mütəxəssislərin hesablamalarına görə, təbii otlaq sahələrinin və torpağın üst münbit qatının yanması nəticəsində ətraf mühitə 13200, atmosfer havasına 318 manat ziyan dəyib. Ümumilikdə, Füzuli rayonunda törədilmiş yanğınlar nəticəsində 13518 manat ziyan dəyib.
Ermənilər tərəfindən son 3 ildə Azərbaycanın işğal altında olan ərazilərində yanğınların törədilməsi intensivləşib. ETSN bu faktla bağlı beynəlxalq təşkilatları məlumatlandırıb.
Trend -un bölgə müxbirinin məlumatına görə, ermənilər tərəfindən ötən gündən başlayaraq törədilən yanğınlar Ağdamın işğal altında olan Başqərvənd, Kəngərli, Şıxlar kəndlərini əhatə edir.
Trend -un arayışı: Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir. Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
Məqalə müəllifi ilə əlaqə ünvanı: [email protected]
