Azərbaycan, Bakı, 5 iyun / Trend, müxbir M.Əliyev/
Ermənilər su ilə "müharibə" edir. Trend-in məlumatına görə, bunu çərşənbə günü jurnalistlərə "Meliorasiya və Su Təsərrüfatı" Açıq Tipli Səhmdar Cəmiyyətinin (ASC) sədri Əhməd Əhmədzadə bildirib:
"Azərbaycan beynəlxalq normalara uyğun, həmçinin qonşu ölkələrin vasitəsilə müvafiq müraciətlər ünvanlayıb ki, ermənilər su ilə müharibə etməsinlər. Amma bu nəticəsizdir, ermənilər öz işlərini görməkdə davam edirlər".
Onun sözlərinə görə, Azərbaycandakı su anbarlarının hamısı nəzarətdədir:
"Gələcəkdə su anbarlarının fəsadlar verməməsi üçün müvafiq tədbirlər görülür. İşğal altında olan "Sərsəng" su anbarının taleyi müharibənin gedişindən asılıdır".
ASC sədri qeyd edib ki, "Sərsəng" su anbarının işğal olunması nəticəsində Azərbaycanın cəbhə bölgələrində yaşayan əhalisi böyük çətinliklər çəkir: "Biz yeraltı sulardan istifadə etməklə, artezian quyularının qazılması ilə bu çətinlikləri aradan qaldırırıq".
Qeyd edək ki, Ağdərə rayonuna məxsus olan "Sərsəng" su anbarının Ermənistan tərəfindən işğalı nəticəsində bu anbarda ötən müddət ərzində qəzalı vəziyyət yaranıb. Bu su anbarında qəza baş verərsə, Azərbaycanın işğal altında olmayan daha 7 rayonuna fəsadlar verəcəyi müəyyənləşdirilib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
