Gürcüstan, Tbilisi, 11 mart / Trend , müxbir N. Kirtsxaliya/ Moldovanın "Demokratiya və İqtisadi İnkişaf Təşkilatı - GUAM"dan çıxmasının mümkünlüyünə dair bəyanatı Rusiyanın NATO-nun aprel ayında Buxarestdə keçiriləcək sammiti öncəsi Moldovanı öz tərəfinə çəkmək təşəbbüsüdür. Bu barədə Gürcüstanın Avropaya İnteqrasiya Komitəsinin sədri Nino Nakaşidze bildirib.
"Təxribat fəaliyyəti Moskva üçün xarakterikdir və Abxaziya üzərindən iqtisadi sanksiyaların götürülməsi və MDB razılaşmasından birtərəfli çıxış bunun təsdiqidir" - deyə çərşənbə axşamı Trend a Nakaşidze bildirib.
Moldova rəhbərliyi dəfələrlə bəyanatlarla çıxış edib ki, son zamanlar Rusiya tərəfindən Dnestryanı münaqişəsinin həllində müsbət dəyişiklik müşahidə olunur və bunun qarşılığında rəsmi Kişinyov NATO və GUAM-dan imtinaya hazır olduğunu bildirir.
Moldova prezidenti Vladimir Voronin "Kommersant" qəzetinə müsahibəsində ölkənin GUAM-dan çıxacağını istisna etməyib. Onun sözlərinə görə, GUAM artıq çoxdandır ki, ölkəyə xeyir gətirmir.
Nakaşidzenin sözlərinə görə, regional əməkdaşlıq çox şey deməkdir, "demokratik seçim ölkələrinin - GUAM-ın böyük perspektivi var".
"GUAM dağılacağı təqdirdə, Avropa İttifaqı tərəfindən qonşuluq siyasətinə üzv ölkələri birləşdirəcək yeni struktur yaradılacaq. Rusiya NATO-nun Buxarest samiti öncəsi bütün usullardan istifadə edərək, keçmiş Sovet məkanı ölkələrinə - Gürcüstan, Moldova, Ukrayna və Azərbaycana öz təsirini artırmağa səy göstərir, lakin Moskvanın istədiyinə çatacağını gələcək göstərəcək" - deyə o bildirib.
Ukrayna eksperti Aleksandr Pali Moldovanın GUAM-dan çıxması məsələsinin Rusiyanın tələbi olmasını istisna etmir.
"Dnestryanı münaqişəsinin nizamlanması çərçivəsində, bu regionda böyük nüfuza malik olan Rusiyaya bir sıra gücəştlərə getməlildir. Moldova artıq bəyan edib ki, NATO-ya daxil olmaqdan imtina etməyə hazırdır. Rusiyanın nəyi təkid etməsi çox mühümdür - bu, Rusiya hərbi qüvvələrinin münaqişəli ərazidə saxlanılmasıdır. Moldova bu şərtlərlə razılaşsa, onun GUAM-dan çıxması istisna olunmur" - deyə Trend a müsahibəsində Ukrayna XİN yanında Ukrayna Diplomatik Akademiyasının Xarici Siyasət İnstitutunun nümayəndəsi Pali bildirib.
Politoloq hesab edir ki, belə olan halda, GUAM-ın mövqeyinin zəiflədilməsi niyyəti var ki, bu da, öz növbəsində, Ukraynanın beynəlxalq mövqeyinin zəifləməsi deməkdir.
"GUAM Təşkilatı bu günədək Gürcüstan, Azərbaycan və Ukraynanın nəqliyyat və energetika imkanlarının perspektivi kimi daha mühümdür. Moldova bu perspektivlərlə əlaqədar deyil" - deyə Pali bildirib.
GUAM-ın formatı 1997-ci ildə Strasburqda Avropa İttifaqı dövlət başçılarının Sammiti zamanı postsovet dövlətləri tərəfindən yaradılıb. 1999-cu ildə Özbəkistan bu formata daxil olsa da, dörd ildən sonra onu tərk edib. 2006-cı ildə Kiyevdə ilk sammit zamanı GUAM-ın beynəlxalq təşkilat və "Demokratiya və iqtisadi inkişaf uğrunda təşkilat- GUAM" kimi elan olunması haqda qərar qəbul olunub.
