İsrail, Qüds, 01 aprel/ " müxbir R.Abdullayev, E.Hüseynov/ İsrail Knesseti tərəfindən "Osmanlı imperiyasında ermənilərin soyqırımının tanınması haqqında" məsələyə xarici işlər və təhlükəsizlik üzrə parlament komissiyasında baxılacaq. Belə qərar çərşənbə axşamı Knesset işləri üzrə komissiyanın iclasında qəbul edilib. Bu barədə Trend -a deputat İosif Şaqal ("Bizim evimiz İsrail" partiyası) məlumat verib.
Martın 26-da İsrail parlamentində "erməni soyqırımının tanınması" məsələsinin müzakirəsi zamanı bu məsələni hansı parlament komissiyasının müzakirəsinə verməyi həll etmək üçün Knesset işləri üzrə komissiyaya səlahiyyət vermək haqqında qərar qəbul edilib. Məsələnin xarici işlər və təhlükəsizlik və ya təhsil üzrə komissiya tərəfindən müzakirəsi imkanları nəzərdən keçirilib.
Əvvəllər təşəbbüsün xarici işlər və təhlükəsizlik üzrə komissiya çərçivəsində müzakirə edilməsinin vacibliyini təklif etmiş Şaqal, təklifinin təqdir edilməsindən razıdır. "Səsvermə keçirilib və Knesset işləri üzrə komissiyanın üzvləri 11 səsə qarşı 2 səslə məsələni xarici işlər və təhlükəsizlik üzrə komissiyaya veriblər", - Şaqal bildirib.
Deputat bildirib ki, müzakirələrin açıq və ya qapalı keçirilməsi məsələsi, hələ ki, müəyyən edilməyib və bu, böyük əhəmiyyət kəsb edir. "Mən bunun bağlı olmasına təkid edəcəyəm. Müzakirələrə kənar şəxslərin buraxılmaması vacibdir. Komissiyada peşəkarlar əyləşirlər və onlar bu məsələni "bağlayacaqlar"", - Şaqal bildirib.
Deputat "erməni soyqırımının" tanınmasının lehinə çıxış edən sol radikal "Mereç" partiyasının komissiyada qəbul edilmiş qərarın təftiş edilməsini tələb ediblər ki, bu da Knessetin Nizamnaməsinə uyğundur. İsrail parlamentariləri mayın 19-dək tətilə çıxırlar və bu məsələlər yalnız bu tarixdən sonra müzakirə edilə bilər. Lakin İsrail-Azərbaycan Parlamentlərarası Dostluq Qrupunun sədri İosif Şaqal əmindir ki, tətildən sonra Knessetdə "erməni soyqırımının tanınması" haqqında məsələ "bağlanacaq".
Knessetin deputatı, Erməni-İsrail Parlamentlərarası Dostluq Qrupunun sədri Zeev Elkin bu gün Trend -a bildirib ki, komissiyanın seçilməsi məsələsinə, çox ehtimal ki, mayın 19-da Knesset işləri üzrə komissiyanın iclasında yenidən baxılacaq. Onun sözlərinə görə, o, hələ yekun olaraq həll edilməyib.
Elkin məsələnin təhsil üzrə komissiya tərəfindən müzakirə edilməsinin məqsədəuyğunluğunu onun akademik və dövlət dairələri tərəfindən müzakirəsinin vacibliyi ilə izah edib.
"Erməni soyqırımının tanınması" məsələsinin müzakirə edilməsi təşəbbüsü Knessetdə 2007-ci ilin mayında da irəli sürülüb, lakin uğursuzluğa düçar olub.
