Azərbaycan, Bakı, 05 may / Trend , müxbir C.Babayeva, K.Zərbaliyeva/ Müxalifəti təmsil edən Ümid Partiyasının Ağsu rayon şöbəsi regional müşavirədən sonra müqavilə ilə icarəyə götürdüyü qərargahdan çıxarılıb. Bu barədə Trend -a bazar ertəsi partiyanın mətbuat xidmətindən məlumat verilib.
Məlumata əsasən, mayın 3-də keçirilən regional müşavirəyə rayon polis idarəsinin müdaxiləsindən sonra partiyanın İcra Aparatının sədri Nəsimi Məmmədli, təşkilat məsələləri üzrə müavin Rəfail Tağızadə və ictimai əlaqələr üzrə müavin Abbasağa Məmmədov, yerli şöbələrdən Ucar, Kürdəmir, Ağdaş, Qəbələ, Ağsu və Şamaxı rayon şöbələrinin rəhbərləri qanunsuz olaraq 3 saat müddətinə Ağsu polis idarəsində saxlanılıb.
Ümid Partiyası Ağsu rayonunda keçirilən tədbirinə polisin müdaxiləsini Konustitusiya, "Sərbəst toplaşmaq" və "Siyasi partiyalar" haqqında Qanunların kobud şəkildə pozulması, siyasi proseslərə müdaxilə, ölkədə prezident seçkiləri öncəsi məqsədyönlu şəkildə qarşıdurma yaratmaq cəhdi kimi qiymətləndirir.
Ağsu rayon polis idarəsinin rəis müavini Mehman Məmmədov bazar ertəsi Trend -a Ümid Partiyası yerli şöbəsinin qərargahının olmadığını bildirib.
"Partiyanın yerli şöbəsi Ağsuda olan çayxanalardan birini müqavilə əsasında qərargah kimi istifadə edib. Çayxananın partiyanın qərargahı olması barədə heç bir qeyd olmayıb",- deyə Məmmmədov bildirib.
Ümid Partiyasının rayon şöbələrinin rəhbərlərinin qanunsuz həbsinə gəldikdə, Məmmədov bildirib ki, onlar həmin çayxanada kütləvi aksiya keçirməyə cəhd göstəriblər.
"16 nəfər şəxs polis idarəsinə gətirilib, onların şəxsiyyətləri müəyyənləşdirilib və xəbərdarlıq edildikdən sonra azad buraxılıblar",- deyə rəis müavini qeyd edib.
Müxalifəti təmsil edən Ümid Pariyası 1993-cü ildə yaradılıb. 2002-ci ildə Vətəndaş Birliyi Partiyası (VBP) Ümid Pariyasına birləşib. VBP-nin sədri olmuş İqbal Ağazadə Ümid Partiyasına sədr seçilib. Ağazadə Milli Məclisin deputatıdır.
Məqalə müəllifi ilə əlaqə saxlamaq üçün ünvan - [email protected]
