Azərbaycan, Bakı, 05 iyun / Trend , müxbir A.Qasımova/ Aİ-nin Ali Komissarı Havyer Solananın Gürcüstana səfəri Aİ-nin Gürcüstana və bütün Cənubi Qafqaz regionuna verdiyi önəmin açıq-aydın sübutudur. Bu haqda Trend -a komissarın mətbuat katibi Kristina Halax bildirib.
İyunun 5-də Gürcüstan paytaxtına iki günlük iş səfər ilə Aİ-nin vahid xarici siyasət və təhlükəsizlik məsələləri üzrə Ali komissarı Havyer Solana gəlir.
"Gürcüstan Aİ-nin yaxın qonşusudur və bu ölkə bizim üçün çox əhəmiyyətlidir", - deyə Halax cümə axşamı elektron poçtla bildirib.
Mətbuat katibi Abxaziya problemi ilə əlaqədar Gürcüstandakı gərgin vəziyyət, regionun daxilində və ətrafında hərbi fəallığın artması ilə bağlı Aİ-nin narahatlığının artdığını qeyd edib. Halax qeyd edib ki, Solana həm gürcü hakimiyyəti ilə, həm də Suxumidə danışıqlar aparacaq və Aİ-nin regionda gərginliyi azaltması üçün daha çox şey edə biləcəyinə inanmağa çalışacaq.
Solana səfər çərçivəsində Batumi şəhərində Gürcüstan prezidenti Mixail Saakaşvili, Baş nazir Vladimir Qurqenidze ilə görüşəcək. Avropa komissarı gürcü müxalifət liderlərilə də görüşməyi planlaşdırır. Səfər zamanı Aİ-nin vahid xarici siyasət və təhlükəsizlik məsələləri üzrə nümayəndəsi Solana "Gürcüstanın beynəlxalq səviyyədə tanınmış sərhədləri çərçivəsində, Abxaziya münaqişəsinin sülh yoluyla nizamlanması məsələlərini" müzakirə edəcək.
