...

Azərbaycanın təhsil naziri "Loğman" Tibb Məktəbi ilə bağlı mövqeyini açıqlayıb

Siyasət Materials 10 İyun 2008 11:46 (UTC +04:00)

Azərbaycan, Bakı, 10 iyun / Trend , müxbir E.Babayev/ Azərbaycanın təhsil naziri bəyan edib ki, qanunsuz fəaliyyət göstərən "Loğman" Tibb Məktəbinin tələbələri başqa təhsil ocaqlarına köçürülməyəcəklər. "Tibb Məktəbində qanunsuz təhsil alan tələbələrin başqa institutlara yerləşdirilməsi ilə bağlı Təhsil Nazirliyinin hər hansı planı yoxdur", çərşənbə axşamı Trend -a təhsil naziri Misir Mərdanov bildirib.

Trend -un arayışı: "Loğman" Tibb Məktəbinin qanunsuz tələbə qəbulu aparması faktı ilə bağlı ötən il Respublika Prokurorluğu tərəfindən cinayət işi başlanıb. Təhsil Nazirliyinin müraciəti əsasında faktla bağlı Cinayət Məcəlləsinin vəzifə səlahiyyətlərindən sui-istifadə (308.1) maddəsi ilə cinayət işi açılıb.

Təhsil Nazirliyinin qərarı ilə tibb sahəsində özəl ali məktəblərə tələbə qəbulu qadağan edilib. Tələbə Qəbulu üzrə Dövlət Komissiyası həmin qərara uyğun olaraq 2007-2008-ci illər üçün həmin ali məktəbə tələbə qəbulu həyata keçirməyib.

Azərbaycan Nazirlər Kabinetinin qərarı ilə bağlanan "Loğman" özəl tibb məktəbinin tələbələri dövlət təhsil müəssisələrinə bərpa edilməyəcəklər.

İki il əvvəl "Loğman" Tibb Məktəbi Təhsil Nazirliyinin qərarı ilə bağlanıb. Lakin buna baxmayaraq, məktəb qeyri-leqal olaraq fəaliyyətini davam etdirib. Məktəb fəaliyyətini dayandırana qədər burada təxminən 2 min tələbə təhsil alırdı.

Mərdanov deyib ki, tələbələrin təhsildən kənarda qalmasının birbaşa məsuliyyəti məktəbin rəhbərliyinin üzərinə düşür. "Təhsil Nazirliyində "Loğman" Tibb Məktəbinin fəaliyyəti ilə bağlı hər hansı hüquqi sənəd və razılıq yoxdur", - nazir əlavə edib. Mərdanov deyib ki, Azərbaycanda bu gün qanunsuz fəaliyyət göstərən özəl institut yoxdur.

Məqalə müəllifi ilə əlaqə ünvanı: [email protected]

Xəbər lenti

Xəbər lenti