Azərbaycan, Bakı, 11 iyun/ Trend , müxbir E.Babayev/ Bu il Azərbaycanda mətbuata dövlət yardımını nəzərdə tutan konsepsiya qəbul ediləcək. "Bu il mətbuata dövlət yardımını nəzərdə tutan konkret addımlar atacağıq", - deyə çərşənbə günü Trend -a Prezidentin İcra Aparatının ictimai-siyasi şöbə müdiri Əli Həsənov məlumat verib.
Trend -un arayışı: Bir müddət öncə Mətbuat Şurası mətbuata yardım edilməsini nəzərdə tutan təkliflərlə çıxış edib. Uzun müzakirələrdən sonra təkliflər sənəd şəklinə salınaraq Prezidentin İcra Aparatına təqdim olunub.
Bir müddət öncə hakimiyyət QHT-lərə Dövlət Dəstəyi Şurası yaradıb.
"Mətbuat orqanları QHT-lərdən fərqli olaraq kommersiya strukturlarıdır. Mətbuata dövlətin yardım göstərməsi tamam fərqli situasiya yaradır. Ona görə də hazırda müəyyən ölkələrin təcrübəsi öyrənilir", - Həsənov əlavə edib.
Onun sözlərinə görə, proses bir qədər uzanır. "Amma düşünürük ki, bu il ərzində sənəd qəbul olunsun", - deyə Həsənov bildirib.
Dövlət rəsmisi qarşıdan gələn 22 iyul - Milli Mətbuat Günü ilə bağlı dövlət tərəfindən müəyyən tədbirlərin həyata keçiriləcəyini də vurğulayıb.
Məqalə müəllifi ilə əlaqə ünvanı: [email protected]