Azərbaycan, Bakı, 17 iyun/ Trend , müxbir E.Babayev/ Hakim Yeni Azərbaycan Partiyası (YAP) hesab edir ki, indiki dövlət başçısı İlham Əliyevin qarşıdan gələn prezident seçkilərində qələbə qazanacağını indidən bəyan etmək qüsur sayıla bilməz. "İlham Əliyevin xalq tərəfindən dəstəklənməsi prezident seçkisinin hansı nəticələrə gətirib çıxaracağı barədə fikir söyləməyimizə ciddi əsaslar yaradır. Bu qəbahət deyil və indiki reallıqlar çərçivəsində Azərbaycana lazım olan vacib bir üstünlükdür", çərşənbə axşamı Trend -a müsahibəsində YAP sədrinin müavini və icra katibi Əli Əhmədov deyib.
Trend -un arayışı: Azərbaycanda prezident seçkisi oktyabrın 15-də keçiriləcək. Müxalifət hesab edir ki, hakimiyyət rəsmiləri tərəfindən İlham Əliyevin böyük səs çoxluğu ilə qələbə qazanacağını indidən bəyan etmək seçkinin qeyri-demokratik keçəcəyini deməyə əsas verir.
İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Əhmədov bildirib ki, Azərbaycan vətəndaşları İlham Əliyevin həyata keçirdiyi siyasətin uğurlarını görür və qətiyyətlə bu uğurları dəstəkləyirlər. "Vətəndaşların bir siyasi qüvvəni və həmin siyasi qüvvənin başında dayanan liderini qəti şəkildə dəstəkləməsini cəmiyyətin çatışmayan tərəfi kimi qiymətləndirmək olmaz. Bəlkə də bunu bugünkü Azərbaycan cəmiyyətinin üstünlüyü kimi qiymətləndirmək lazımdır ki, cəmiyyətin mütləq əksəriyyəti prezidentin həyata keçirdiyi siyasəti dəstəkləməkdə vahid bir mövqedən çıxış edir. Cəmiyyətdə vahid bir mövqenin olması həm vətəndaş həmrəyliyinin güclənməsinə gətirib çıxarır, həm də cəmiyyətin özünün potensialının əhəmiyyətli dərəcədə artmasına səbəb olur", - deyən Əhmədov hesab edir ki, bütün bunlar heç də seçkidə namizədlərin sayının az olacağı demək deyil. "Seçkidə İlham Əliyevlə yanaşı, digər namizədlər də iştirak edəcəklər. Onların nə dərəcədə şanslı olması başqa məsələdir", - deyə o əlavə edib.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
