Azərbaycan, Bakı, 21 iyul/ Trend , müxbir E.Babayev/ Azərbaycanın müxalif Müsavat Partiyası Bakı Şəhər İcra Hakimiyyəti qarşısında növbəti dəfə piket keçirmək barədə qərar verib. "Piket avqsutun 1-də keçiriləcək", -bunu Trend -a Müsavatın Divanının bazar ertəsi keçirilən iclasından sonra, Müsavat Partiyasının Mərkəzi İcra Aparatının rəhbəri Arif Hacılı bildirib.
Trend -un arayışı: Müsavat Bakı Şəhər İcra Hakimiyyətini iyunun əvvəllərində məhkəməyə verib. İyunun 25 - də Səbail rayon məhkəməsi Müsavatın iddiası ilə bağlı qərar çıxararaq, partiyanın iddiasını rədd edib. Partiya yaxın vaxtlarda bu qərardan appelyasiya şikayəti verib. Müsavatın iddiasında Bakı meriyasının partiyanın mayın 4 - də keçirmək istədiyi mitinqə müvafiq yer ayrılmaması ilə bağlı qərarının, qanunsuz sayılaraq, ləğvi tələb olunurdu. Müsavat mayın 4 -nə və 18 - nə planlaşdırdığı iki mitinqi təxirə salıb. Buna Bakı meriyasının aksiyaçıları Bibiheybət qəsəbəsindəki stadionu təklif etməsi olub. Partiya mitinqə Ukrayna meydanı, keçmiş "Qələbə" kino-teatrının qarşısı, "Nərimanov" metrostansiyasının ətrafı, Füzuli meydanı və ya "Təbriz" (keçmiş "Sevinc") kino - teatrının qarşısındakı ərazilərdən birinin ayrılmasını istəyirdi. Partiya Bakı Şəhər İcra Hakimiyyətinin qarşısında iki icazəsiz piket keçirib. İyulun 11- də keçirilən piketdə Müsavatın 13 fəalı polis tərəfindən saxlanılmışdı və onlara xəbərdarlıq edildikdən sonra sərbəst buraxılmışdılar.
Hacılı vurğulayıb ki, bu dəfəki piketdə yenə sərbəst toplaşmaq hüququnun məhdudlaşdırılmasına etiraz olunacaq.
Müxalifəti təmsil edən Müsavat Partiyası 1992 - ci ildə yaradılıb. Partiyanın başqanı İsa Qəmbər Azərbaycan parlamentinin spikeri (1992-1993 - cü illərdə) və 2003 - cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
