Azərbaycan, Bakı/ Trend müxbir C.Babayeva/ Azərbaycan Demokrat Partiyası Ali Şuranın şənbə günü keçirilən iclasında ölkədə oktyabrın 15-də keçiriləcək prezident seçkilərində heç bir formada iştirak etməmək barədə qərar qəbul edib. Bu barədə Trend -a partiya sədrinin müavini Taliyət Əliyev məlumat verib.
Əliyev belə qərarın əsas səbəbi kimi Azərbaycanın Seçki Məcəlləsinə edilən sonuncu düzəlişləri, həmçinin seçicilərin seçkilərdə passiv iştirakını göstərib.
Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. 2007-ci ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
İndiyədək Azərbaycan prezidenti vəzifəsinə Yeni Azərbaycan Partiyasının sədri İlham Əliyevin, Müasir Müsavat Partiyasının sədri Hafiz Hacıyevin, Ümid Partiyasının sədri İqbal Ağazadənin, Azərbaycanın Liberal-Demokrat Partiyasının sədri Fuad Əliyevin və Yaşıllar Partiyasının sədri Mais Güləliyevin namizədliyi irəli sürülüb.