Azərbaycan, Bakı, 06 avqust / Trend , müxbir E.Babayev/ Azərbaycanın müxalif Vətəndaş Birliyi Partiyası (VBP) prezident seçkilərində öz namizədi ilə iştirak etməyəcək. "Seçki ilə bağlı yekun qərarımız verilməsə də, seçkiyə öz namizədimizlə qoşulmayacağımız dəqiqləşib",- çərşənbə günü Trend -a VBP sədri, millət vəkili Sabir Hacıyev bildirib.
Trend -un arayışı: Azərbaycanda prezident seçkisi oktyabrın 15- də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi Partiyası seçkiləri boykot etmək barədə qərar verib. Müsavat, Vətəndaş Həmrəyliyi, Demokrat, Böyük Quruluş partiyaları isə, seçkidə öz namizədləri ilə iştirakdan imtina ediblər.
İndiyədək növbəti prezident seçkilərində iştirak etmək üçün Mərkəzi Seçki Komissiyasına (MSK) 11 nəfər müraciət edib. Siyasi təşkilatlardan hakim Yeni Azərbaycan Partiyasının namizədi İlham Əliyevin, Ümid Partiyasının sədri İqbal Ağazadənin, Müasir Müsavat Partiyasının sədri Hafiz Hacıyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Liberal-Demokrat Partiyasının sədri Fuad Əliyevin, Yaşıllar Partiyasının sədri Mais Güləliyevin sənədləri MSK-ya təqdim edilib. Bundan başqa, Yaşar Əhmədovun (işsiz), Əlimuxtar Əkbərovun (təqaüdçü), Sevinc Quliyevanın (Sumqayıt Mərkəzi Klinik Xəstəxanasında sanitar), Vüqar Seyidovun (həkim), Qüdrət İsaqovun (AMEA-nın Fizika İnstitutunun aparıcı elmi işçisi) sənədləri MSK-ya təqdim edilib.
Hacıyev xatırladıb ki, VBP bir müddət öncə radikal müxalifətçilikdən imtina edib. Onun sözlərinə görə, buna səbəb Azərbaycan hakimiyyəti tərəfindən həyata keçirilən siyasətin dövlətin və xalqın maraqlarına cavab verməsidir. "Buna baxmayaraq, hələlik bizim hakimiyyətin namizədini dəstəkləyəcəyimiz barədə mövqe açıqlaya bilmərəm. Yaxın vaxtlarda partiyanın seçki ilə bağlı ya qurultayı, ya da partiyanın Mərkəzi Şurasının iclası keçiriləçək. İndidən hansı namizədi dəstəklədiyimi bildirməyim partiya üzvlərinə təzyiq kimi qiymətləndirilə bilər",- deyə o bildirib.
VBP 1999 - cu ildə Azərbaycanın eks-prezidenti, 1992 - ci ildən Moskvada mühacirətdə yaşayan Ayaz Mütəllibovun rəhbərliyi altında yaradılıb. 2000 - ci ilin parlament seçkilərindən sonra partiyada fikir ayrılığı yaranıb və təşkilat partiya katibi, hazırda Ümid Partiyasının sədri olan İqbal Ağazadə və Ayaz Mütəllibovun tərəfdarlarından ibarət iki hissəyə bölünüb. Ağazadənin tərəfdarları 2003 - cü ildə VBP adından imtina edib. 2003 - cü ildə Mütəllibov VBP-nin Azərbaycan Sosial Demokrat Partiyasına birləşməsi haqqında qərar qəbul edib. Lakin partiya katibi olan Hacıyev bununla razılaşmayıb və VBP onun rəhbərliyi altında fəaliyyətini davam etdirir. VBP 2005 - ci ilin parlament seçkilərinə müxalifət partiyası kimi qatılıb və hazırda seçki komissiyalarında müxalifəti təmsil edir.
Məqalə müəllifi ilə əlaqə ünvanı: [email protected]
