Azərbaycan, Bakı, 09 oktyabr / Trend , müxbir A.Hüseynbala / Eks-spiker Rəsul Quliyevin lideri olduğu Azərbaycanın Açıq Cəmiyyət Partiyası (ACP) prezident seçkisində indiki dövlət rəhbəri İlham Əliyevin namizədliyinin dəstəklənməsi haqda qərar versə də, seçkini boykot edən və iştirak etməyən siyasi təşkilatlarla əməkdaşlığı davam etdirmək niyyətindədir.
"Açıq Cəmiyyət Partiyası bir partiya kimi formalaşmadığından, bu qurumla əməkdaşlığın da konkret əhəmiyyəti yoxdur", cümə axşamı Trend -a müxalif Azərbaycan Demokrat Partiyasının (ADP) sədri Sərdar Cəlaloğlu bildirib.
Trend - un arayışı : Azərbaycanda prezident seçkisi oktyabrın 15-də keçiriləcək. Prezident seçkisində yeddi namizəd - Yeni Azərbaycan Partiyasının (YAP) sədri, hazırki dövlət rəhbəri İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək.
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks - spikeri, hazırda mühacirətdə yaşayan Rəsul Quliyevdir. 2007- ci ilin fevralınadək ADP-nin sədri olmuş Quliyev və onun tərəfdarları etiraz olaraq ADP- dən imtina edib, özlərinin Açıq Cəmiyyət Partiyasını yaradıblar.
ACP sədrinin müşaviri Solmaz Ələsgərova və İdarə Heyətinin üzvü, Ali Məclis sədrinin müavini Oqtay Mirzəyev partiyanı fəaliyyətsizlikdə qınayaraq, istefa veriblər.
ACP Ali Məclisinin oktyabrın 8-də keçirilən iclasında prezident seçkisində indiki dövlət rəhbəri İlham Əliyevin namizədliyinin dəstəklənməsi barədə qərar qəbul olunub.
ADP sədrinin fikrincə, ACP-nin yaranması ilə dağılması az müddət çəkib.
"ACP buraya toplaşan adamların, xüsusən Rəsul Quliyevin fərdi imicinə görə formalaşan təşkilat olduğundan, imici də darmadağın oldu. Ona görə indi kimsəni ACP deyilən qurumla əməkdaşlıq maraqlandırmır. Bu qərardan sonra bizim həmin partiya ilə hər hansı əməkdaşlığımız mümkün deyil", - Cəlaloğlu bildirib.
ACP-dən keçmiş partiyalarına kimlərinsə qayıtması məsələsinə gəldikdə, Cəlaloğlu düşünür ki, gedənlərin bir qismi artıq birinci mərhələdə bu addımı atıb: "Onlar aldandıqlarını görüb qayıdıblar. ACP-də qalanların sırasından bundan sonra bizim partiyaya üz tutacaq kimsəni tanımıram. Onlar ya YAP-a gedəcək, ya da siyasətdən tamamilə uzaqlaşacaqlar. Çünki vaxtilə ADP-yə öz maraqlarını təmin etmək naminə gəlmişdilər, Rəsul Quliyevin hakimiyyətə gəlməsi hesabına nəsə əldə etmək niyyətindəydilərəsR".
ADP sədri ACP-nin qərarının Quliyevin Azərbaycana qayıdışı üçün müsbət addım olacağı haqda iddialarla da razılaşmır: "Rəsul Quliyevin Azərbaycana qayıtmağa heç bir ehtiyacı yoxdur. Çünki ailəsi bütünlüklə xaricdə yaşayır. Buradakı qohumları ilə münasibətləri isə məlumdur. O, Amerikanın həyat tərzinə tamamilə öyrənib. Onun xalqımıza münasibəti də bəllidir - kifayət qədər öz xalqına yuxarıdan aşağıya baxır. Onun siyasi məqsədi yoxdursa, bura qayıtmağa da heç bir səbəbi yoxdur", - ADP sədri vurğulayıb.
Müsavat Partiyası Mərkəzi İcra Aparatının rəhbəri Arif Hacılı bu qərarın həm ACP-nin elektoratına, həm də bütövlükdə bu qurumun tərəfdarlarına daha ciddi təsir edəcəyini bildirib: "Rəsul Quliyev İlham Əliyevi dəstəkləmək barədə partiya strukturlarından ona olunan təklifləri qəbul etməyib. Ona görə mən Quliyevin mövqeyini daha önəmli sayıram", - Hacılı deyib.
Müsavat funksionerinin fikrincə, istər eks-spiker Quliyevin, istərsə də eks-prezident Ayaz Mütəllibovun Azərbaycana qayıtmaq niyyətlərini müsbət qəbul edir: "Düşünürəm ki, tanınmış siyasətçilərin ölkədən kənarda olması Azərbaycanın mənafelərinə həm demokratiyanın inkişafı, həm də milli təhlükəsizlik baxımından ziyanlıdır. Ona görə hakimiyyət onların ya amnistiya, ya da centlmen razılaşma yolu ilə geri dönmələrinə şərait yaratmalıdır".
Məqalə müəllifi ilə əlaqə ünvanı: [email protected]