Azərbaycan, Bakı, 06 noyabr / Trend , K.Zərbalıyeva/ Azərbaycanın müxalifət partiyası Bakı şəhər Apellyasiya Məhkəməsinə şikayət verib.
"Partiya Bakı Şəhər İcra Hakimiyyəti tərəfindən onların sərbəst toplaşmaq azadlığının təmin olunması ilə bağlı ötən ilin oktyabrında Səbail rayon məhkəməsinə müraciət etsə də, məhkəmə şikayəti təmin edilməyib", - Azərbaycan Milli İstiqlal Partiyasının mətbuat katibi Əli Orucov cümə axşamı Trend -a bildirib.
AMİP hökumətin tarif siyasətinə etiraz olaraq Füzuli meydanında aksiya keçirmək üçün ötən il 7 və 17 sentyabr tarixlərində şəhər İcra Hakimiyyətinə müraciət etmişdi. İcra Hakimiyyəti isə onların müraciətini rədd etmişdi. Bakı Şəhər İcra Hakimiyyətinin bu qərarından sonra AMİP Səbail rayon məhkəməsinə müraciət etsə də, məhkəmənin 22 oktyabr 2007-ci il tarixli qərardadı ilə iddia rədd olunmuşdu.
Ali Məhkəmə isə partiyanın kassasiya şikayətini təmin edərək işi yenidən araşdırılması üçün birinci instansiya məhkəməsinə göndərib.
Səbail rayon məhkəməsi şikayətə yenidən baxaraq onun təmin olunmaması barədə qərardad qəbul edib.
Bu qərarı ədalətsiz hesab edən partiya yenidən ondan apellyasiya şikayəti verib.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir
Məqalə müəllifi ilə əlaqə ünvanı: [email protected]