Azərbaycan, Bakı, 23 yanvar / Trend , müxbir A.Hüseynbala/ Azərbaycanın müxalif partiyasının referendumla bağlı təsis etdiyi təşviqat qrupuna imza vərəqələri verilib.
"Milli İstiqlal" təşviqat qrupunun təsis sənədlərində heç bir problem olmadığından Mərkəzi Seçki Komissiyası bu gün imza vərəqələrini partiyanın səlahiyyətli nümayəndələrinə təqdim edib", - cümə günü Trend -a Azərbaycan Milli İstiqlal Partiyasının (AMİP) mətbuat və informasiya katibi Əli Orucov bildirib.
Trend -un arayışı: Martın 18 - də Konstitusiyanın 29 - cu maddəsinə əlavə və dəyişikliklərin edilməsi məsələsi üzrə referendum keçiriləcək.
Referendum üzrə hələ 13 təşəbbüs qrupu yaradılıb. Bunlardan dördü imza vərəqələrini MSK-ya təhvil verib.
Azərbaycanın Konstitusiyası 1995 - ci ildə qəbul edilib, 2002 - ci ildə Əsas Qanuna əlavə və dəyişikliklər edilib.
Orucovun sözlərinə görə, artıq bu gündən imzaların toplanılmasına başlanılıb. "40 min imzanın toplanılması üçün vaxt azdır. Amma biz qısa müddətdə bu prosesi başa çatdıracağıq", - AMİP funksioneri əlavə edib.
АMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Ondan sonra AMİP-in sədri olan Əli Əliyevə qarşı partiya daxilində narazılıq yarandığı zaman partiya üzvlərinin bir qismi AMİP-dən gediblər.
Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
