Azərbaycan, Bakı, 22 oktyabr /Trend, müxbir M.Əliyev/
Dağlıq Qarabağ münaqişəsi üzrə vasitəçilərin hazıladığı "Madrid prinsipləri"nin çoxlu təkamülə məruz qalması rəsmi Yerevana manevr imkanı yaradır. Bunu cümə günü Trend-ə politoloq, Siyasi İnnovasiya və Texnologiya Mərkəzinin direktoru Mübariz Əhmədoğlu bildirib.
"ATƏT Minsk qrupunun həmsədrlərinin hazırladığı "Yenilənmiş Madrid prinsipləri" sənədinin adını "Stepanakert/Xankəndi prinsipləri" kimi dəyişməklə rəsmi Yerevanın konkret mövqeyinə nail olmaq mümkündür", - Əhmədoğlu əlavə edib.
"Madrid prinsipləri" sözünün əvəzinə "Stepanakert/Xankəndi prinsipləri" sözünün işlənməsi Qafqazın reallıqlarına və tənzimləmənin ruhuna daha uyğundur", - o bildirib.
Politoloqun sözlərinə görə, ümid etmək olar ki, ATƏT-in Minsk qrupunun həmsədrləri Xankəndində uzun müddət olublar və orada tənzimləmə variantı üzərində iş aparıblar.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.