Fransa, Strasburq, 7 aprel /Trend, müxbir A.Məhərrəmli
Avropa Şurası Parlament Assambleyasının (AŞ PA) yaz sessiyası çərçivəsində Azərbaycan nümayəndə heyətinin üzvü Rafael Hüseynovun Avropa Şurası ilə Azərbaycan arasında səmərəli əməkdaşlığın keçmişini və perspektivlərini əks etdirən sənədi nəşr edilərək yayılıb.
Trend-in məlumatına görə, Azərbaycanın bu təşkilata üzv olduğu illər ərzində ölkədə demokratik cəmiyyət və hüquqi dövlət quruculuğu, insan haqlarının daha da bərqərar olması istiqamətində əldə edilən nailiyyətlərdən bəhs edən R.Hüseynov, eyni zamanda, Azərbaycanın Avropa Şurasındakı nümayəndə heyətinin bu təşkilatın zənginləşməsinə ciddi töhfələr verdiyini vurğulayıb.
Sənəddə deyilir: "Biz hamımız əlamətdar tarixi hadisənin ərəfəsindəyik. Bir ay sonra yalnız Avropanın deyil, dünyanın ən mühüm beynəlxalq təşkilatlarndan olan Avropa Şurasının 65 yaşı tamam olur. Hər bir yuvarlaq tarix ilk növbədə arxada qalan yolu təhlil etmək, gələcək barədə düşünmək üçün bir fürsətdir. Avropa Şrası yarananda artıq dünya iki qlobal müharibə yaşamışdı və həmin iki müharibədən daha uzun sürəcək üçüncü soyuq müharibə başlanırdı. Avropa Şurasının qitəmiz və bütün bəşəriyyət qarşısındakı ən başlıca xüdməti bundan ibarətdir ki, məhz həmin soyuq müharibənin başa çatmasına və daha demokratik bir dünyanın qurulmasına əvəzsiz töhfələrini verdi. Nəticə bu gün burada - Strasburqda, Avropa Evinin qarşısında dalğalanan bayraqlardır. Avropa Şurası təşkil edilən vaxtlarda bu ölkələrin bir çoxu üçün dövlət müstəqilliyi əlçatmaz arzu idi. Bu gün vahid Avropa Şurası ailəsinin üzvü olan həmin ölkələrin bir çoxu uzaq olmayan tarixdə soyuq müharibə səngərinin əks tərəflərində idilər. Bu gün isə birlikdə mübarizə aparırıq ki, qitəmiz və dünyamız hər növ isti və soyuq müharibələrdən, həddən artıq isti və həddən artıq soyuq münasibətlərdən uzaqda qalsın".
Millət vəkili sənəddə Azərbaycanın AŞ Nazirlər Komitəsinə sədrlik dönəmindən də bəhs edib: "Gələn ay Azərbaycanın da ictimai-siyasi həyatı üçün çox əlamətdardır. Artıq 13 ildir ki, Azərbaycan Avropa Şurasının üzvüdür və may ayında biz bu mötəbər təşkilatın Nazirlər Komitəsinə rəhbərlik edəcəyik. XXI əsrin bu 13 ili əslində sıxılmış vaxtdır, zahirən göründüyündən daha uzun bir tarix parçasıdır. 1918-ci ilin may ayında Azərbaycan Şərqdə ilk demokratik respublikanı qurmuşdu. Lakin təəssüf ki, biz həmin müstəqilliyi xarici təcavüz nəticəsində iki il sonra itirmişdik. İndi 23 ildir ki, yenidən müstəqilik və bir dəfə itirdiyimizə görə bəlkə də bu müstəqilliyin qiymətini daha yaxşı anlayır, suverenliyin dəyərini böyük müstəqillik tarixi olan ölkələrdən də artıq tuturuq. Və müstəqilliyimizin XXI əsr içərisində çətin yollardan keçərək irəliləməsində, möhkəmlənməsində, ölkəmizdə demokratik təsisatların bərqərar olmasında, insan hüquqlarının daha geniş şəkildə təmin edilməsində, hüquqi dövlət quruculuğunda Avropa Şurasının misilsiz rolu var. Biz də Avropa Şurasına gənc müstəqil dövlətlərin ən böyük sərvəti olan suverenliyin başlıca zirehlərindən, qoruyucularından biri kimi baxırıq. Bu inam həm də zənnimcə, Avropa Şurasının ən böyük məsuliyyətini yaradır. Avropa Şurasının həmin ümidi və inamı qırmağa haqqı yoxdur və üzv ölkələrin müstəqilliklərinə qarşı ortaya çıxan istənilən situasiyada bu təşkilat öz sözünü deməlidir. Bir ay sonra Avropa Şurasının Nazirlər Komitəsinə rəhbərlik etməyə başlayacaq Azərbaycan 13 il əvvəlki Azərbaycan deyil. Bu artıq iqtisadi, siyasi, mədəni cəhətdən qat-qat irəliləmiş, güclənmiş, müsbət dünya təcrübələrini əxz etmiş, sabaha inamla gedən bir dövlətdir. Bu inkişafda Avropa Şurasının haqqı böyükdür və bunun üçün biz həmişə minnətdar olacağıq".
Sənəddə habelə Azərbaycanın təşkilatın fəaliyyətinə töhfələr verdiyi də qeyd olunur: "Azərbaycan arxada qalan müddətdə Avropa Şurasından yalnız öyrənməyib, həm də bu təşkilatın zənginləşməsinə öz layiqli töhfələrini verib. Azərbaycan nümayəndə heyəti ilk gündən Parlament Assambleyasında daim fəallıq göstərib, ümumavropa problemlərinin müzakirələrinə həmişə həssaslıqla yanaşıb. Azərbaycan nümayəndə heyəti üzvlərinin arxada qalan dövrdə hazırlamış olduğu çoxsaylı sənədlər, mühüm məruzələr, irəli sürdüyü faydalı ideyalar bunun əyani sübutudur. Avropa Şurasının 65 yaşının tamam olması kimi əlamətdar bir tarixin Daimi Komitənin Bakıda keçirilən iclası, Azərbaycanın bu qurumun Nazirlər Komitəsinə rəhbərlik etməyə başlaması dövrünə təsadüf etməsini də bir tarixi qanunauyğunluq sayıram. Bu görülmüş işlərin yaxşı nəticəsi həm Avropa Şurasının, həm Azərbaycanın uğurunun göstəricisidir. Bu, səmərəli əməkdaşlığın, qarşılıqlı inam və etibarın sübutudur. Məhz belə bir model bütün gələcəkdə Avropa Şurasının fəaliyyət modeli olaraq qalarsa, söz yox ki, təşkilatın beynəlxalq aləmdəki nüfuzu indikindən də artıq olacaq".
Qeyd etmək lazımdır ki, bu ilin may ayında Azərbaycan Avropa Şurası Nazirlər Komitəsinə sədrliyi qəbul etdikdən sonra AŞ PA-nın növbəti yay sessiyasında Strasburqda Azərbaycan dövləti adından ayrıca təqdimatın olacağı nəzərdə tutulub.
Trend-in ən mühüm və maraqlı xəbərlərini "Telegram"da izləyin
