Bakı. Gülqız Muradova - Trend:
Beynəlxalq Qızıl Xaç Komitəsi (BQXK) İraqın Mosul şəhəri yaxınlığında saxlanılan 1300-ə yaxın qadın və uşağa kömək edir və onlara səfirliklərlə əlaqə saxlamağa yardım göstərir.
Bunu Trend-ə BQXK-nin baş ofisinin mətbuat xidmətindən bildiriblər.
Qeyd olunub ki, Komitə bu insanların digər ölkələrdəki yaxınları ilə əlaqə yaratmağa çalışır. Həmin şəxsləri milliyəti barədə məlumat verilməyib.
Həmin insanların repatriasiyası və qayıtmasına gəldikdə isə, mətbuat xidmətindən bildirilib ki, bu, İraq hökuməti ilə həmin insanların ölkələri arasında ikitərəfli məsələdir: "Təhvil verilmə beynəlxalq hüquqa əsasən həyata keçirilməlidir. Xüsusi diqqət böyüklərin müşayiət etmədiyi və buna görə də təhlükəyə məruz qalan uşaqlara ayrılmalıdır".
İraqın Azərbaycandakı müvəqqəti işlər vəkili Fadil Avad əl-Şuveyli isə bildirib ki, ölkəsi orada qalan azərbaycanlı uşaqların taleyi ilə bağlı Azərbaycanın rəsmi qurumları ilə danışıqlar aparır.
Qeyd edək ki, iki azərbaycanlı uşaq - 2 yaşlı Xədicə və 4 yaşlı Abdulla İŞİD-dən azad olunmuş Suriya ərazisində tapılmışdı. Onlar bu ərazilərin azad olunmasından sonra təhlükəsizlik qüvvələri tərəfindən İraqa gətirilmişdi. 4 yaşlı Abdulla isə bu yaxınlarda Azərbaycana gətirilib.
Xatırladaq ki, Dövlət Təhlükəsizliyi Xidmətinin rəisi general-leytenant Mədət Quliyev bildirib ki, 900-ə yaxın azərbaycanlı İŞİD-ə qoşulmuşdu: "Onlardan 85-i hüquq-mühafizə orqanları tərəfindən saxlanılıb və pentensiar xidmətdədirlər. 195 nəfər Azərbaycan vətəndaşlığı hüququndan məhrum edilib, bir çoxu isə döyüş zamanı həlak olub. İraqda Azərbaycan vətəndaşlarının kütləvi olduğu yerdə 300-ə yaxın azərbaycanlı məhv edilib. Əməkdaşlarımız hazırda İraqdadırlar və araşdırırq ki, bu məlumat düz və ya səhvdir".