Bakı.Trend:
Əgər kimsə Azərbaycan dövlətinə qarşı cinayət törədibsə, mütləq şəkildə cəzasını çəkməlidir.
Bunu Trend-ə Prezident yanında Dövlət İdarəçilik Akademiyasında müşavir, Bakı Politoloqlar Klubunun sədri Zaur Məmmədov deyib.
O qeyd edib ki, Azərbaycan separatçılara dəfələrlə xəbərdarlıq etməsinə baxmayaraq, onlar Qarabağda oturaraq Azərbaycanı təhdid edirdilər.
"Əgər onlar doğurdan da Qarabağda yaşayan erməni əhalisini girov götürməmişdilərsə, o zaman niyə separatizmin alovlanması üçün əlindən gələni edirdilər.
Ruben Vardanyanla əlaqəli xüsusi məsələ var. Bu ondan ibarətdir ki, o Azərbaycan torpağında oturaraq Azərbaycanın konsititusiyasını pozub, qeyri-qanuni şəkildə Qarabağa daxil olub, separatizmin alovlanması, Azərbaycan və Ermənistan arasında sülh müqaviləsinin imzalanmaması üçün əlindən gələni edirdi. Bu həm onun çıxışlarından, həm də atdığı addımlardan görünürdü. O Xankəndidə oturub, öz maliyyə imkanlarından istifadə edərək xarici mediaya Azərbaycan əleyhinə açıqlamalar verirdi.
İndi öz cəzasını çəkəcək. Ruben Vardanyan sonuncu olmayacaq. Azərbaycana qarşı cinayət törədənlərin heç biri cəzasız qalmayacaq", - deyə Z.Məmmədov bildirib.
Xatırladaq ki, sentyabrın 27-də “Laçın” dövlət sərhədindən buraxılış məntəqəsində Dövlət Sərhəd Xidmətinin hərbi qulluqçularının sayıqlığı nəticəsində ölkə ərazisinə qeyri-qanuni gələrək qondarma “Dağlıq Qarabağ Respublikasının Dövlət naziri” vəzifəsində çalışmış 1968-ci il təvəllüdlü Ruben Karleni Vardanyan Azərbaycan Respublikasından Ermənistan istiqamətində hərəkət edərkən saxlanılıb.
Hazırda Ermənistan Respublikasının vətəndaşı olan 1968-ci il təvəllüdlü Vardanyan Ruben Karlenoviçin Azərbaycan Respublikası Cinayət Məcəlləsinin 214-1 (terrorçuluğu maliyyələşdirmə), 279.3 (qanunvericiliklə nəzərdə tutulmayan silahlı birləşmələrin və ya qrupların yaradılmasında və fəaliyyətində iştirak etmə) və 318.1-ci (Azərbaycan Respublikasının dövlət sərhədini qanunsuz olaraq keçmə) maddələri ilə nəzərdə tutulan cinayət əməllərini törətməsinə əsaslı şübhələr müəyyən edilib.
Törətdiyi qeyri-qanuni əməllərə görə Ruben Vardanyan 27 sentyabr 2023-cü il tarixində saxlanılaraq, ittiham elan edilməklə təqsirləndirilən şəxs qismində cinayət məsuliyyətinə cəlb olunmuş, barəsində məhkəmənin qərarı ilə həbs qətimkan tədbiri seçilmişdir.
Hazırda cinayət işi üzrə istintaq-əməliyyat tədbirləri davam etdirilir.