Bakı. Trend:
Antiterror tədbirləri Azərbaycan tarixində yeni bir qəhrəmanlıq səhifəsi kimi yazıldı. Bu tarixlərdə Qarabağda keçirilən lokal antiterror əməliyyatları nəticəsində Azərbaycan bütün suveren ərazilərində nəzarəti bərpa edərək separatçılığın kökünü kəsdi, Ermənistanın və havadarlarının ümidlərini puç etdi.
Bunu Trend-ə Milli Məclisin deputatı Afət Həsənova deyib.
Deputat bildirib ki, bu əməliyyatların həyata keçirilməsinin bütün məsuliyyəti Ermənistanın üzərinə düşür:
“Ermənistan öz xislətinə “sadiq” qalaraq 2020-ci il noyabrın 10-da imzalanmış bəyanatla üzərinə götürdüyü öhdəlikləri yerinə yetirməməsi bu əməliyyatların həyata keçirilməsini zərurətə çevirdi.
Azərbaycan 44 günlük Vətən müharibəsində tarixi Zəfər qazandı və Ermənistan ordusunu acı məğlubiyyətə uğratdı. Bununla belə, Azərbaycan qalib tərəf olaraq humanistlik göstərdi və Ermənistana öz öhdəliklərini yerinə yetirmək üçün şərait yaratdı.
Lakin Ermənistan hər zaman olduğu kimi öz öhdəliklərini yerinə yetirməkdən boyun qaçırdı və separatçı əməllərinə davam etdi. Ermənistan nə qanunsuz silahlı dəstələrini Azərbaycan ərazisindən çıxardı, nə digər öhdəliklərini yerinə yetirdi, əksinə ardıcıl təxribatlara davam etdi, Azərbaycan ərazisində separatçılara dəstək göstərdi.
Ermənistan öz havadarlarına arxalanaraq qanunsuz silahlı dəstələrini Azərbaycan ərazisində uzun müddət saxlamağa ümid edirdi. 19-20 sentyabr tarixlərində keçirilən lokal antiterror əməliyyatları nəticəsində Azərbaycan bütün suveren ərazilərində nəzarəti bərpa edərək separatçılığın kökünü kəsdi, Ermənistanın və havadarlarının ümidlərini puç etdi. Bu gün Azərbaycanın bütün guşələrində üçrəngli bayrağımız qürurla dalğalanır”, - deyə deputat əlavə edib.