Sentyabrın 13-də Azərbaycan Respublikası Apellyasiya Məhkəməsində hakim Salman Babayevin sədrliyi ilə Türk Millətçi Partiyasının sədri Vüqar Bəyturanın şikayətinə baxılıb.
Trend məlumat verir ki, V.Bəyturanın məhkəmə orqanlarına müraciət etməsinin səbəbi 70 saylı Masallı seçki dairəsi tərəfindən namizədliyinin qeydə alınmaması, Mərkəzi Seçki Komissiyasının (MSK) isə həmin qərarı qüvvədə saxlaması olub.
Partiya sədri bu nəticədən narazı qalaraq Apellyasiya Məhkəməsinə müraciət edib. Apellyasiya şikayətinə hakim Salman Babayevin sədrliyi ilə baxılıb və Mərkəzi Seçki Komissiyasının məlum qərarı qüvvədə saxlanılıb.
V.Bəyturansa iddia edir ki, namizədliyinin qeydə alınması üçün kifayət qədər imza toplayıb. Hətta əvvəlcə MSK-nın saytında onun namizədliyinin qeydiyyata alınması barədə məlumat da yerləşdirilib. Lakin sonradan həmin məlumat saytdan çıxarılıb.
Apellyasiya Məhkəməsi tərəfindən çıxarılmış qərarı ədalətsiz hesab edən Vüqar Bəyturan hüquqlarını bərpa etmək üçün bütün addımları atacağını bildirib. V.Bəyturan: "Əvvəlcə Ali Məhkəməyə kassasiya şikayəti verəcəyəm. Əgər həmin instansiya da ədalətli qərar çıxarmasa o zaman Konstitusiya Məhkəməsinə müraciət edəcəyəm".
