Naxçıvan şəhər İcra Hakimiyyətinin böyük salonunda hakim Yeni Azərbaycan Partiyası (YAP) Naxçıvan şəhər təşkilatının II konfransı keçirilib. Bu barədə Trend ə YAP mətbuat xidmətindən məlumat verilib.
Konfrans iştirakçıları əvvəlcə Naxçıvan şəhərinin baş meydanına gələrək mərhum eks-prezident Heydər Əliyevin əzəmətli heykəlini ziyarət ediblər, abidə önünə tər qərənfil dəstələri düzüblər. Sonra Heydər Əliyev Muzeyinə baxış keçiriblər.
Konfransın gündəliyinə əsasən YAP Naxçıvan şəhər təşkilatının sədri Ələkbər Quliyev hesabat məruzəsilə çıxış edib.
Məruzəçi hesabat dövrü ərzində görülən işlərdən danışaraq qeyd edib ki, hazırda YAP Naxçıvan şəhər təşkilatında 181 ərazi ilk təşkilatı fəaliyyət göstərir. Bu təşkilatlarda ümumilikdə 10 min 182 nəfəp partiya üzvü cəmləşib. YAP-ın I, II, III qurultayları və Naxçıvan Muxtar Respublika təşkilatının III konfransının qərarları əsasında öz işini quran YAP Naxçıvan şəhər təşkilatı partiyada gənclərin və qadınların fəaliyyətinin genişləndirilməsini ümdə vəzifə kimi həyata keçirib. Bunun da nəticəsində partiyada qadınların sayı 4986 nəfərə, gənclərin sayı isə 4874 nəfə çatıb. Hesabat dövrü ərzində 381 nəfər partiya üzvü müxtəlif səbəblərdən YAP Naxçıvan şəhər təşkilatının qeydiyyatından çıxarılıb. Bunlardan 341 nəfəri yaşayış və iş yerlərini dəyişdiyindən, həmçinin Naxçıvan Dövlət Universitetini, Naxçıvan Tibb Məktəbini, Naxçıvan Müəllimlər İnstitutunu, Naxçıvan Dövlət Texniki Kollecini bitirdiklərindən, 39 nəfər partiya üzvü vəfat etdiyindən partiyanın Proqram və Nizamnaməsinin tələblərinə uyğun olaraq qeydiyyatdan çıxarılıb, 1 nəfər isə partiyaya səmimiyyətini itirdiyindən təşkilatın sıralarından xaric edilib. 45 nəfər partiya üzvü digər rayon və şəhər təşkilatlarından YAP Naxçıvan şəhər təşkilatının qeydiyyatına alınıb. Bununla yanaşı, 10 nəfər digər partiya təşkilatlarından çıxaraq, YAP-a daxil olmub. 3 nəfər rus millətindən olan vətəndaş da pariya sıralarına daxil edilib.
Nəzarət-Təftiş Komissiyasının hesabatı dinlənildikdən sonra, hər iki məruzə ətrafında müzakirələr olub.
Konfransda mandat komissiyasının hesabatı ilə əlaqədar komissiyanın sədri Aidə Əliyevanın məruzəsi dinlənilib. Təşkilatın hesabat dövrü ərzində gördüyü işlər qənaətbəxş hesab olunub. Təşkilat məsələləri müzakirə edildikdən sonra Ələkbər Quliyev altıncı dəfə YAP Naxçıvan şəhər təşkilatının sədri seçilib. Bununla yanaşı, konfransda YAP Naxçıvan şəhər təşkilatının siyasi şurasında 31 nəfər, nəzarət-təftiş komissiyasının yeni tərkibində 5 nəfər, idarə heyətinə 13 nəfər nümayəndə seçilib, 14 maddədən ibarət qərar layihəsi təsdiq edilib.
Sonra konfrans iştirakçıları adından Yeni Azərbaycan Partiyasının sədri, prezident İlham Əliyevə müraciət qəbul olunub.
Qeyd edək ki, YAP 1992-ci ildə Naxçıvanda yaradılıb. Partiyanın ilk sədri mərhum eks-prezident Heydər Əliyev olub. 14 ildir ki, hakim partiya olan YAP-ın indiki sədri prezident İlham Əliyevdir.
