Azərbaycan, Bakı, 22 may / Trend , müxbir K.Zərbalıyeva/ "Azadlıq" qəzetinin müxbirinin döyülməsi ilə bağlı cinayət işinə xitam verilib.
Baş Prokurorluğun mətbuat xidmətinin yaydığı məlumatda bildirilir ki, istintaq zamanı şahidlər Aqil Xəlilin "Zeytunlar bağı" adlanan ərazidə döyülməsini təsdiq etməyiblər. İş üzrə şahid qismində dindirilmiş Dağbəyi Allahverdiyev və Akif Çovdarov da jurnalisti döymədikləriin deyiblər.
Həmçinin məhkəmə-tibbi müayinə zamanı Xəlilin bədənində hər hansı xəsarətin əlamətlərinin aşkar olunmadığı barədə rəy verilib.
Müxbirin martın 13-də bıçaqlanmasında təqsirləndirilən Sergey Strekalinlə bağlı cinayət işi isə məhkəməyə göndərilib. Strekalin qəsdən sağlamlığa az ağır zərər vurma və satış məqsədi olmadan qanunsuz olaraq narkotik vasitələri əldə etmə və saxlamada ittiham olunur.
Prokurorluq jurnalistin mayın 7-də metroda ona sui-qəsd edilməsi və oğurlanmasına cəhd edilməsi ilə bağlı açıqladığı məlumatların da sübuta yetirilmədiyini bildirib.
Məlumatda deyilir ki, istintaq zamanı Xəlilə, onun ailə üzvlərinə mənəvi və fiziki təzyiqlər göstərilməyib, jurnalistə hər hansı işgəncə verilməyib.
Müəlliflə əlaqə saxlamaq üçün elektron ünvan - [email protected]
