Azərbaycan, Bakı, 23 aprel /Trend, müxbir H.Bağırov/
Azərbaycanda qumar borcuna görə xüsusi amansızlıqla qətl törətməkdə təqsirli bilinən şəxsə hökm oxunub. Trend-in məlumatına görə, bu gün Ağır Cinayətlərə Dair İşlər Üzrə Məhkəmədə Bakı şəhər sakini İmanulla Bəşirov 14 il müddətinə azadlıqdan məhrum edilib.
Bəşirov qumar oynayarkən Şahin Nurməmmədova 140 manat uduzub. 2009-cu il dekabrın 24-də Nurməmmədov qumarda udduğu pulu Bəşirovdan istəyib. Həmin zaman aralarında yaranan mübahisə nəticəsində Bəşirov Nurməmmədovu güllələyərək qətlə yetirib.
Yasamal Rayon Polis İdarəsinin Cinayət Axtarış Şöbəsi və 26-cı polis bölməsi əməkdaşlarının birgə keçirdiyi əməliyyat-axtarış tədbirləri nəticəsində Bəşirov həbs edilib. Ondan "Makarov" tipli tapança və 7 ədəd patron aşkar edilərək götürülüb.