...

İrandakı quraqlıqda Qərb ölkələrinin rolu yoxdur

Cəmiyyət Materials 19 May 2011 16:37 (UTC +04:00)

Azərbaycan, Bakı, 19 may /Trend, müxbir T.Cəfərov/

İran Prezidenti Mahmud Əhmədinejad Qərb ölkələrini İranda quraqlıq yaratmaqda ittiham etsə də, ekspertlər hesab edir ki, xüsusi texnologiyalardan istifadə edərək yağıntıların digər ölkələrə getməsinin qarşısını almaq elmi baxımdan düzgün deyil.

"Digər ölkələrdə yağıntılar olmasın deyə, hər hansı bir ölkənin çoxlu güc və vəsait sərf edərək xüsusi texnologiyalar vasitəsilə buludları dağıtmasının elmi əsası yoxdur", - Tehran Universitetinin professoru və ekologiya məsələləri üzrə iranlı ekspert İsmail Kəhrom (Esmail Kahrom) Trend-ə bildirib.

İran Prezidenti Mahmud Əhmədinejad mayın 19-da Ərak şəhərində "Seyid Kamal Saleh" su bəndinin açılış mərasimində çıxışı zamanı bildirib ki, Qərb dövlətləri dünyanın bəzi ölkələrində, o cümlədən İranda quraqlıq yaratmaq üçün xüsusi proqram hazırlayaraq icra edirlər. O əlavə edib ki, ötən bir il ərzində Asiya və Avropada iqlim dəyişiklikləri və yağıntıların vəziyyəti onu göstərir ki, Avropa ölkələri xüsusi texnologiyalardan istifadə edərək yağıntıların region ölkələrinə, o cümlədən İrana gəlib çatmasına mane olurlar. "Qərb ölkələri bununla region ölkələri arasında suya görə qarşıdurma yaratmaq və onları müharibəyə sövq etmək istəyir", - İran Prezidenti bildirib.

Kəhrom deyib ki, hər hansı bir Avropa ölkəsi (Böyük Britaniya, Fransa) və İran arasında beş-altı min kilometr məsafə var. "Belə olduqda, elmi baxımdan belə bir işin görülməsi qeyri-mümkündür və ya əgər mümkündürsə, mənim xəbərim yoxdur", - o deyib.

Kəhrom bildirib ki, İran quraqlıq və yarımquraqlıq zonada yerləşir. Onun sözlərinə görə, İran hazırda çox ağır quraqlıq dövrünü yaşayır. "Rəsmi statistikaya əsasən, keçən il İranda yağıntının səviyyəsi ötən 42 il ərzində orta hesabla yağan yağışlardan 79 faiz az olub. Bu, ölkədə yağıntıların nə qədər azaldığının göstəricisidir", - Kəhrom deyib.

Kəhromun fikrincə, susuzluq probleminin həlli üçün sudan qənaətlə istifadə etmək lazımdır. "Quraqlıq illərini keçirmək üçün sudan qənaətlə istifadə olunmalıdır, modern vasitələrdən istifadə etməklə suyun israfının qarşısı alınmalıdır", - o deyib.

İran quraqlıq zonada yerləşir və ötən 40 il ərzində bu ölkədə müxtəlif dövrlərdə quraqlıq olub.

1992-2002-ci ildə baş verən quraqlıq bu ölkənin əkinçilik sahəsinə böyük ziyan vurub və bəzi şəhərlərdə, o cümlədən paytaxt Tehranda içməli suya kvotalar tətbiq olunub.

İranda 2008-ci ilin yay aylarından yeni dövr quraqlıqlar başlayıb. 2008-ci ilin yay aylarında da bu ölkənin bəzi şəhər və kəndlərində içməli suya kvotalar tətbiq olunub.

İranda quraqlıq dövrü illəri adətən 5-7 il arası olur. Ehtimal olunur ki, 2008-ci ildə başlayan quraqlıq bir neçə il davam edəcək.

Xəbər lenti

Xəbər lenti