Azərbaycan, Bakı, 28 dekabr /Trend, müxbir İ.İsabalayeva/
Tələbə Qəbulu üzrə Dövlət Komissiyasının sədri Məleykə Abbaszadə ali məktəblərə qəbul imtahanlarında idmançıların topladığı balların azlığından narahatlıq bildirib. Trend-in məlumatına görə, bunu Abbaszadə çərşənbə günü 2011-ci il üzrə tələbə qəbulunun nəticələrinə həsr olunan tədbirdə bildirib.
Abbaszadə deyib ki, Azərbaycanda ali məktəblərə qəbul imtahanlarında idmançılar 70-100 bal toplayır.
Bu məsələnin onu narahat etdiyini deyən Komissiya sədrinin sözlərinə görə, qəbul imtahanlarında rejissorlar, müğənnilər isə 100-200 bal toplayır.
"Belə olmalıdırmı? Rejissorlar xahiş edirlər ki, onların ballarını aşağı salaq. Ancaq gərək həmin şəxslərin bilikləri olsun. İdmançıların nəticələri də bizi qane etmir", - TQDK sədri deyib.
O bildirib ki, ali məktəbə qəbul olunanların 51 faizi 300-500 bal nəticə göstərməlidir.
"Bu isə onu göstərir ki, onlar yaxşı tələbə olacaqlar", - Abbaszadə deyib.