Bakıda 1700-dən çox insan dəm qazından zəhərləndiyi üçün təcili tibbi yardıma müraciət edib

Azərbaycan, Bakı, 3 yanvar /Trend, müxbir İ.İsabalayeva/

Ötən il ərzində Bakı şəhər Təcili və Təxirəsalınmaz Tibbi Yardım Stansiyasına (BŞTTTYS) dəm qazından zəhərlənmə ilə əlaqədar 1709 nəfər müraciət edib. Bunu cümə axşamı Trend-ə BŞTTTYS-nin Operativ və hospital işlərinin təşkili şöbəsinin böyük həkimi Zemfira Vahidova deyib.

Onun sözlərinə görə, həmin şəxslərin 974 nəfəri xəstəxanalara yerləşdirilib. Təkcə ötən ilin dekabr ayında dəm qazından zəhərlənmə ilə əlaqədar 400 nəfər müraciət edib. Həmin şəxslərin 275 nəfəri xəstəxanalara yerləşdirilib. Vahidova dəm qazından zəhərlənmələrin daha çox soyuq havalarda baş verdiyini deyib.

Onun sözlərinə görə, bayram günlərində - dekabrın 31-i, yanvarın 1 və 2-də dəm qazından zəhərlənmə ilə əlaqədar 60 nəfər müraciət edib. Dəm qazından ən çox zəhərlənmə halları dekabrın 31-də baş verib. Həmin gün BŞTTTYS-yə 26 nəfər müraciət edib, onların 17-si xəstəxanaya yerləşdirilib. Yanvarın 1-də 19 nəfər (13 nəfər xəstəxanaya yerləşdirilib), yanvarın 2-də 15 nəfər (10 nəfər xəstəxanaya yerləşdirilib) dəm qazından zəhərləndiyi üçün BŞTTTYS-yə müraciət edib.

Vahidova deyib ki, adi günlərdə BŞTTTYS-yə gün ərzində 1500-1600 müraciət daxil olurdusa, bayram günlərində çağırışların sayı 2000-ə çatıb. O, çağırışların sayının artmasının səbəbini daha çox həmin günlərdə poliklinikaların işləməməsi ilə izah edib.