...

Azərbaycanda eyni adların müxtəlif formalarda yazılması halları aradan qaldırılacaq

Cəmiyyət Materials 18 Noyabr 2013 12:04 (UTC +04:00)
Azərbaycanda eyni adların müxtəlif formalarda yazılması hallarının aradan qaldırılması üçün bütün adların düzgün yazılışının göstərildiyi kitab hazırlanacaq.
Azərbaycanda eyni adların müxtəlif formalarda yazılması halları aradan qaldırılacaq

Azərbaycan, Bakı, 18 noyabr /Trend, müxbir İ.İsabalayeva/

Azərbaycanda eyni adların müxtəlif formalarda yazılması hallarının aradan qaldırılması üçün bütün adların düzgün yazılışının göstərildiyi kitab hazırlanacaq.

Nazirlər Kabineti yanında Terminologiya Komissiyasının sədr müavini Sayalı Sadıqova Trend-ə bildirib ki, komissiyanın nəzdindəki Adlar və soyadlar bölməsi Azərbaycan dilində olan bütün adlar sistemini bir kitab şəklində hazırlamağı planlaşdırır.

Yeni kitabda adların düzgün, təkmilləşdirilmiş yazılış formaları öz əksini tapacaq. Bu kitab Ədliyyə Nazirliyinin Vətəndaşlıq vəziyyəti aktlarının dövlət qeydiyyatı şöbələrinə göndəriləcək.

S.Sadıqova deyib ki, bu gün Azərbaycanda adların yazılışında müxtəlif formalar özünü göstərir: "Məsələn, suallar verilir ki, Fuad adının sonuncu hərfinin "d", yaxud "t" ilə yazaq? Eyni zamanda, mürəkkəb adların yazılış formalarını təkmilləşdirmək, dilimizdə olan adlar sistemini tam şəkildə formalaşdırmaq lazımdır. Bunun üçün də Adlar və soyadlar bölməsi istəyir ki, ilk növbədə, adlardan ibarət olan kitabça nəşr etdirsin və qeydiyyat şöbələrinə təqdim etsin".

Zamanla yeni adların yarandığını deyən komissiya sədrinin müavini bildirib ki, son dövrlərdə Azərbaycanda yaranan yeni adların əksəriyyəti türk mənşəlidir. Hazırda uşaqlara qoyulan yeni adlar arasında da sırf Azərbaycan dilinə məxsus olan, türk mənşəli adlar üstünlük təşkil edir: "Əgər hər il dilə 100 yeni ad daxil olursa, bu, böyük yenilikdir. Ancaq mən təəssüf edirəm ki, dilimizə hər il 100 deyil, ən çox halda 10-15 ad daxil olur".

S.Sadıqovanın sözlərinə görə, Azərbaycanda uşaqlara istifadə edilməyən türk mənşəli adların qoyulması üçün təbliğat işlərinin aparılması nəzərdə tutulur.

Komissiyanın sədr müavini qeyd edib ki, bu gün bəzi adlar sırf türk mənşəli olsa da, işlədilmir. Uşaqlara daha çox Yusif, Hüseyn, Əhməd, Əli, Məhəmməd adları qoyulur: "Qızlara isə Nuray, Nurgün adı çox qoyulur. Bizim dilimizdə Nuray, Nurgün, Yusif və Əlidən başqa adlar yoxdurmu? Uşaqlara hardasa 10-15 ad daha çox verilir, qalan adlar artıq dilin arxiv fonduna keçir. Biz istəyirik ki, təbliğat aparaq ki, bütün adlardan istifadə olunsun".

Məqalədə:
Xəbər lenti

Xəbər lenti