Bakı. Samir Əli - Trend:
Kənd Təsərrüfatı Nazirliyinin və Azərbaycan Arıçılar Assosiasiyasının birgə təşkilatçılığı ilə 20 oktyabr - 7 noyabr tarixlərində Bakıda arıçılıq məhsullarının 21-ci Respublika Sərgi-Satış Yarmarkası keçiriləcək. Yarmarkada ölkənin bütün bölgələrindən sahibkarlar arı məhsullarını satışa çıxaracaq. İşğaldan azad edilən Kəlbəcər ərazisində arı təsərrüfatı ilə məşğul olan sahibkarlar da yarmarkada iştirak edə biləcəkmi?
Kənd Təsərrüfatı Nazirliyinin İctimaiyyətlə əlaqələr şöbəsinin rəisi Vüqar Hüseynov məsələ ilə bağlı Trend-ə açıqlamasında deyib ki, sahibkarlar yarmarkada iştirak etmək üçün əvvəlcədən qeydiyyatdan keçməlidir: "Sahibkarlar yarmarkada iştirak üçün müraciət edir və qeydiyyatdan keçirilir. Qeydiyyatdan keçən sahibkar öz məhsulunu yarmarkada satışa çıxarır. Digər sahibkarlar kimi, Kəlbəcərdə arıçılıqla məşğul olan sahibkarlar da müraciət edib qeydiyyatdan keçə bilərlər. Əgər həmin arıçılar müraciət edərsə, onların da müraciəti müsbət qarşılanacaq və Kəlbəcər balı yarmarkada satışa çıxarılacaq".
Kəlbəcər rayonu ərazisində arı ailəsi saxlayan sahibkar Sabir Mustafayev isə Trend-ə bildirib ki, Kəlbəcərdə saxladığı balın bir hissəsini satsa da, yarmarka üçün də saxlayıb: "Bu dəfə Bakıda keçiriləcək bal yarmarkasına Kəlbəcər balı da çıxaracağam. Kəlbəcərdə arılardan aldığımız bal digər rayonlarda alınan baldan iki dəfə artıq oldu. Kəlbəcər arıçılığın inkişafı üçün çox əlverişlidir. Keyfiyyət baxımından da Kəlbəcər balının keyfiyyəti yüksəkdir".
S.Mustafayev bildirib ki, ötən il arıçılıq üçün məhsuldar il olmayıb: "Ötən il dağlıq ərazilərdə məhsuldarlıq aşağı oldu. Hər arı yeşiyindən 19 kilo bal götürüldü. Amma bu il bu göstərici 25-30 kiloqram oldu. Müəyyən sayda arı ailəsini Daşkəsənə, bir qismini isə Kəlbəcərə apardıq. Daşkəsəndə bir arı ailəsindən 28 kiloqram, Kəlbəcərdə isə 53 kiloqram bal götürdük. Çünki Kəlbəcərdə iki dəfə süzmə elədik".
Sahibkar qeyd edib ki, hazırda başqa ərazilərin balının 1 kiloqramı 20-25 manat, Daşkəsən balının bir kiloqramı 30-35 manat, Kəlbəcər balının bir kiloqramı isə 40-45 manatdır: "Biz həmçinin hər il əldə etdiyimiz məhsulun 20 faizini şəhid ailələrinə pay veririk. Hər il bal mövsümündə şəhid ailələrinə baş çəkirik və onlara müəyyən qədər bal veririk. Bu il də əldə etdiyimiz balın bir hissəsini şəhid ailələrinə vermişik".