Bakı. Trend:
Xaçmaz rayonunda görkəmli oftalmoloq-alim, Azərbaycan tibb elminə misilsiz töhfələr bəxş etmiş akademik Zərifə xanım Əliyevanın anım günü ilə bağlı tədbir keçirilib.
RİH-dən Trend-ə verilən məlumata görə, tədbir iştirakçıları əvvəlcə Zərifə xanımın adını daşıyan məktəbdə görkəmli alimin büstü önünə tər çiçəklər düzüb, əziz xatirəsini ehtiramla yad ediblər.
Zərifə Əliyeva adına muzeydə akademikin həyat və yaradıcılığına həsr olunmuş fotostendlərə baxış keçiriblər.
Xaçmaz Rayon İcra Hakimiyyəti başçısının müavini Günel
Nürəddinova Zərifə xanım Əliyevanı peşəkar həkim olmaqla yanaşı,
həm də fəal ictimai xadim kimi xarakterizə edib. Həkim peşəsini
vicdanla yerinə yetirən oftalmoloq-alimin insanların sağlamlığının
qorunmasında, xəstəliklərin qarşısının alınmasında göstərdiyi
səylərə toxunaraq onun öz həmvətənlərinin qayğısına qalan humanist
insan olduğunu diqqətə çatdırıb.
Çıxış edən müəllimlər və tibb işçiləri Zərifə xanım Əliyevanın
zəngin və mənalı ömür yolundan danışıblar. Görkəmli oftalmoloq
təkcə respublikamızda deyil, həmçinin beynəlxalq aləmdə də tanınmış
alim, ziyalı, ictimai xadim kimi xatirələrdə yaşadığı
vurğulanıb.
Anım tədbiri məktəblilərin hazırladığı ədəbi-bədii kompazisya ilə davam edib.
