Bakı. Trend:
ADA Universiteti, Azərbaycan Respublikası Elm və Təhsil
Nazirliyi və “Regional İnkişaf” İctimai Birliyinin birgə
təşkilatçılığı ilə “VII ADA 2024” Beynəlxalq Təhsil Konfransı
keçirilib.
Trend xəbər verir ki, “Təhsildə bərabərliyə doğru: tədqiqat və
təcrübəyə nəzər” şüarı altında keçirilən konfrans alimləri, təhsil
siyasətinin icrasında iştirak edənləri, müstəqil tədqiqatçıları,
təhsil işçilərini və tələbələri bir araya gətirərək tədris və
öyrənmə, liderlik və təhsil müəssisələri, qiymətləndirmə və
dəyərləndirmə daxil olmaqla müxtəlif mövzularda tədqiqatlar qəbul
edib.
İki gün davam edən konfransın açılış mərasimində ADA
Universitetinin rektoru, səfir Hafiz Paşayev, Elm və təhsil naziri
Emin Əmrullayev və ADA Universitetinin Strategiya və inkişaf üzrə
prorektoru Vəfa Kazdal iştirakçıları salamlayıb.
Qeyd edilib ki, konfransın əsas məqsədi həm fərdi, həm də ictimai
rifaha əsaslanan formal və ya ömürboyu öyrənmə təhsil səviyyəsində
bərabərsizliyi aradan qaldıran, o cümlədən bərabərliyi və ədaləti
təşviq edən siyasət, eləcə də paradiqmaların yaradılmasını tövsiyə
edə bilən elmi araşdırmaların və tədqiqatların
dəyərləndirilməsidir.
Konfransın ilk günü Azərbaycan Respublikasının Dövlət İmtahan
Mərkəzinin Direktorlar Şurasının sədri Məleykə Abbaszadənin
“Təhsildə bərabərsizliyi aradan qaldırmağa yönəli keçmişə və
gələcəyə əsaslanan yanaşma” mövzusundakı əsas çıxışı işə başlayıb.
Daha sonra Vaterloo Universitetinin Riyaziyyat, Biznes və Mühasibat
Proqramlarının direktoru İlham Axundovun “Sabahın təhsilini
formalaşdırmaq: bərabərlik, məlumat savadlılığı, koqnitiv yük və
süni intellekt” mövzusunda əsas çıxışı iştirakçıların diqqətinə
çatdırılıb.
Müxtəlif təhsil müəssisələrindən nümayəndələrin iştirakı ilə
keçirilən panel müzakirələr bir çox aktual mövzunu əhatə edib. İlk
olaraq “Tədrisin təşkilində müxtəlifliklər (Kənd və Şəhər, Dövlət
və Özəl, Tədris dili: Azərbaycan dili, rus dili, ingilis dili)”
mövzusunda prorektor Vəfa Kazdalın moderatorluğu ilə panel müzakirə
keçirilib. “Təhsilverənlərin şəhər və regionlar üzrə bölünməsi"
mövzusuna həsr olunan ikinci panel müzakirə Elm və Təhsil
Nazirliyində Məktəbəqədər və ümumi təhsil siyasəti şöbəsini müdiri
Vəfa Yaqublunun moderatorluğu ilə baş tutub.
Konfransın ikinci günü “Regional İnkişaf” İctimai Birliyi
tərəfindən konfransa cəlb edilən inklüziv təhsil üzrə mütəxəssis,
Yenilikçi Müəllim Mərkəzinin sədri Kayahan Karlının əsas çıxışı ilə
başlayıb. Çıxış “Universal Dizayn, İnklüziv Təhsildə Aparıcı
Yanaşma” mövzusuna həsr olunub. “İnklüzivlik və yaxud eksklüzivlik”
“Müəllim Hazırlığında Müasir Təhsil Proqramları və Yanaşmalar”
mövzusunda keçirilən panel müzakirəyə ADA Universitetinin müəllimi
Elnur Eyvazov moderatorluq edib.
Bakı Dövlət Universitetinin nümayəndəsi Elmina Kazimzadənin
moderatorluğu ilə baş tutan növbəti panel müzakirə “Sosial-İqtisadi
Vəziyyətlə Əlaqədar Bərabərsizlik: Özəl Repititorluq” mövzusunda
olub.
“Təhsildə bərabərsizliyin tədqiqi: Əsas məsələlər, metodoloji
yanaşmalar və təhsildə bərabərsizlikləri müəyyən edən faktorlar”
başlığı altında keçirilən üçüncü panel müzakirəyə ADA
Universitetindən Abbas Abbasov moderatorluq edib. Konfransın son
panel müzakirəsi “Təhsildə Bərabərsizlik: Təhsil Siyasətinin
Perspektivləri” mövzusunda olub və ADA Universiteti Təhsil
fakültəsinin dekanı Ülviyyə Mikayılovanın moderatorluğu ilə baş
tutub. Çıxışlardan sonra konfrans öz işini paralel sessiyalar ilə
davam etdirib.
Qeyd edək ki, konfransdan öncə ADA Universitetinin və “Regional
İnkişaf” İctimai Birliyinin nümayəndələri tərəfindən iştirakçılar
üçün müxtəlif sessiyalar keçirilib. İki gün ərzində isə təhsildə
ədalət və bərabərlik sahəsindəki qeyri-müəyyənlikləri, ziddiyyətli
məqamları araşdıran elmi tədqiqatlar iştirakçıların diqqətinə
çatdırılıb.