"Bakı Şəhər İcra Hakimiyyətinin kütləvi toplantılar keçirilməsi üçün bir neçə marşrut müəyyənləşdirməsi tədbir iştirakçılarının təhlükəsizilyini təmin etmək məqsədi daşıyır". Bu fikirləri Trend ə Bakı Şəhər İcra Hakimiyyətinin ictimai-siyasi qurumlarla iş üzrə şöbə müdiri Zaur Ramazanov bildirib.
Qeyd edək ki, üçün Bakı Şəhər İcra Hakimiyyəti dinc toplantıların keçirilməsi üçün bir neçə marşrut müəyyənləşdirib və bu siyahını ictimaiyyətə açıqlayıb.
Z.Ramazanov qeyd edib ki, əvvəllər siyasi partiyaların yürüş-mitinq keçirdikləri "20 Yanvar"- "Qələbə" marşrutu hazırda kütləvi aksiyalar üçün əlverişli yer sayılmır: "Çünki hazırda həmin ərazidə müxtəlif tikinti işlərinin aparılması, strateji əhəmiyyətli obyektlərin - yol qovşaqları, körpü və tunellərin tikilməsi, həmçinin nəqliyyatın intensiv hərəkət etməsi burada kütləvi toplantı zamanı təhlükəsizliyə zəmanət vermir. Müsavat Partiyası da bu marşrut üzrə yürüş-mitinq keçirməyi təklif etmişdi, amma hazırda bu marşturu əhatə edən ərazidə ictimai təhlükəsizliyin təmin olunması sual altındadır"-deyə Z.Ramazanov qeyd edib.
Z.Ramazanovun sözlərinə görə, Bakı Şəhər İcra Hakimiyyəti həm aksiya iştirakçılarının, həm bu tədbirin təhlükəsizliyini təmin etməli olan polislərin, həmçinin başqa vətəndaşların hüquqlarının və təhlükəsizliyinin qorunması, əhalinin hər hansı narazılığının yaranmaması baxımından bu siyahını hazırlayıb.
Z.Ramazanov piketlərlə bağlı müraciətlərin BŞİH-də qəbul edilməməsi barədə məlumatları təkzib edib. Onun sözlərinə görə, İcra Hakimiyyətinə ünvanlanan bütün ərizələr, məktublar qəbul edilir və daxil olduqdan sonra aidiyyatı üzrə şöbələrə göndərilir: "Bizdə bütün müraciətlərə baxılır və ərizəçilərə müvafiq cavab verilir. "Sərbəst toplaşmaq haqqında" Qanunda da qeyd olunub ki, tədbirin keçirilməsi haqda təşkilatçılar ən azı 5 gün əvvəl bu barədə xəbərdarlıq məktubu göndərilməlidir. Amma bəzən aksiyadan 2-3 gün əvvəl müraciət təqdim olunur, yaxud da poçt vasitəsilə göndərilir. O zaman bu sənədin ya gecikmiş olur, ya da bizə gəlib çatması yubanır. Amma istənilən halda ərizəni verən şəxslə əlaqə saxlanılır və mütləq ona müvafiq cavab verilir"-deyə Z.Ramazanov qeyd edib.
O, əlavə edib ki, iş saatı başa çatdıqdan sonra da məktub təqdim olunanda müvafiq təlimata uyğun olaraq mühafizəçilər tərəfindən qəbul edilmir. Z.Ramazanov bildirib ki, BŞİH bəzən hansısa piketlərin keçirilməsini məqsədəuyğun hesab etmədiyi hallarda həmin ərizəni baxılması üçün öz adından aidiyyatlı orqanlara göndərir, bu yolla ərizəçinin probleminin həllinə çalışır: "Bəzən isə ümumiyyətlə bizim səlahiyətimizə aid olmayan məsələlərlə bağlı müraciətlər daxil olur. Məsələn, hansısa ictimai, siyasi təşkilatın qərargahla təmin edilməsi ilə bağlı müraciət gəlir. Amma bizim belə bir səlahiyyətimiz yoxdur".
Z.Ramazanov kütləvi aksiyalar üçün razılıq istənilməsinə ehtiyac olmaması barədə bir sıra müxalifətçi qurumların mövqeyi ilə razılaşmayıb: "İctimai-siyasi təşkilatlar bu problemi qaldırırlar ki, biz razılıq gözləməməliyik. Qanunda göstərilib ki, göndərilən müraciətin daxilində aksiyanın keçirilməsi tarixi, yeri, iştirakçılarının sayı və sair məsələlər barədə məlumat verilməlidir. Həmçinin aksiya təşkilatçısı öz koordinatlarını da verməlidir - ev ünvanı, şəhər və mobil telefon nömrələri və s. Qanuna görə, təşkilatçılar bu tədbirlərini müvafiq icra orqanları ilə razılaşdırmalıdırlar. Bəzi siyasi qurumların dediyi kimi, əgər razılıq verilməsini gözləməməlidirlərsə və sadəcə xəbərdarlıq etməlidirlərsə, onda nə üçün Bakı Şəhər İcra Hakimiyyətindən cavab məktubu gözləyirlər, bu məktubu almaq üçün müraciət edirlər?"
Şəhər İcra Hakimiyyətinin nümayəndəsi onu da deyib ki, kütləvi aksiyalara icazə verilməməsi məsələsi müxtəlif dairələrdə çox müzakiə olunur və görünür ki, qanuna müvafiq dəyişikliklər edilməsinə zərurət var.
Bakı Şəhər İcra Hakimiyyətinin yığıncaq, mitinq, nümayiş, küçə yürüşlərinin keçirilməsi üçün paytaxtda ayrılmış yerlər - küçə və meydanlar aşağıdakılardır:
Mitinq üçün meydanlar - Səbail rayonu - "Nefçilər" İdman Sağlamlıq Mərkəzinin Bibiheybətdəki stadionu; Nizami rayonu - Rüstəm Rüstəmov küçəsindən Heydər Əliyev adına Bakı neft emalı zavoduna doğru gedən yoldakı meydan; Xətai rayonu - Ukrayna meydanı; Suraxanı rayonu - "Neftçi" İdman Sağlamlıq Mərkəzinin Tofiq İsmayılov adına stadionu.
Küçə yürüşləri üçün marşurutlar isə - Nizami rayonu - metronun "Neftçilər" stansiyası yanından (Dakar meydanından) başlayaraq Rüstəm Rüstəmov küçəsindən keçməklə Heydər Əliyev adına Bakı neft emalı zavodunun yaxınlığındakı meydana qədər (məsafə 1600 metr); Xətai rayonu - metronun "Həzi Aslanov" stansiyasının yanından başlayaraq Məhəmməd Hadi kuçəsindən keçməklə Ukrayna meydanınadək (məsafə 1200 metr); Suraxanı rayonu - Səttar Bəhlulzadə adına meydandan "Neftçi" İdman-Sağlamlıq Mərkəzinin Tofiq İsmayılov adına stadionunadək (məsafə 1000 metr).
Ayrılan yerlərdə toplantının keçirilməsi vaxtı və ya küçə yürüşünün vaxtı və marşurutu Bakı Şəhər İcra Hakimiyyəti ilə razılaşdırılmalıdır.
