ATƏT-in Bakı ofisi Azərbaycanın özəl teleradio yayım şirkəti olan ANS-in bağlanması ilə bağlı bəyanat yayıb. Bu haqda Trend ATƏT-in Bakı ofisinin informasiyasına istinadən məlumat verib.
Məlumatda deyilir ki, ATƏT noyabrın 24-də Azərbaycanda ilk özəl teleradio şirkəti olan ANS-in bağlanmasına görə narahatdır. "Azərbaycanın Milli Televiziya və Radio Şurası ANS-in lisenziyasının uzadılmaması ilə bağlı qərar qəbul edib. Bu, "qanunvericiliyin mütəmadi pozulması, Televiziya və Radio Şurası tərəfindən verilən rəsmi xəbərdarlıq və cərimə sanksiyalarına məhəl qoyulmaması və qanun pozuntuları ilə bağlı Şura tərəfindən verilən irad və xəbərdarlıqlara qeyri-səmimi münasibətin nümayişi" ilə əsaslandırılıb. "Bu addım Azərbaycanda müstəqil KİV-in gələcəyi ilə bağlı suallar doğurur," deyə ATƏT-in Bakı Ofisinin rəhbəri Maurisio Pavesi bildirib.
