Azərbaycan, Bakı, 6 fevral /Trend, müxbir M.Əliyev/
Azərbaycanın futbol üzrə milli çempionatının oyunları təxirə salına bilər.
Azərbaycan Peşəkar Futbol Liqasının prezidenti Ramin Musayev bazar ertəsi Trend-ə bildirib ki, şaxtalı, qarlı və güclü küləkli hava şəraiti müşahidə olunarsa, həftəsonu Unibank Premyer Liqasının oyunları təxirə salınaraq başqa vaxta keçirilə bilər.
O qeyd edib ki, Bakıdakı stadionların əksəriyyəti süni ot örtüklü olduğundan qarın meydançadan təmizlənməsi çətinliklərlə başa gəlir.
2012-ci il üçün Unibank Premyer Liqasının ilk oyunları fevralın 10-11-də baş tutmalıdır.
XIX tur çərçivəsində fevralın 10-da AZAL (Bakı) - "Sumqayıt" (Sumqayıt), "Qarabağ" (Ağdam) - "Simurq" (Zaqatala), fevralın 11-də isə "Turan" (Tovuz) - "Xəzər Lənkəran" (Lənkəran), "İnter" (Bakı) - "Rəvan" (Bakı), "Kəpəz" (Gəncə) - "Qəbələ" (Qəbələ), "Bakı" (Bakı) - "Neftçi" (Bakı) oyunları keçirilməlidir.
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun məlumatına görə, fevralın 7-si axşamdan Bakı ərazisində hava şəraiti yenidən kəskin soyuqlaşacaq və çovğun olacaq.