Bakı. Cani Babayeva - Trend:
Milli Olimpiya Komitəsi (MOK) Yeniyetmələrin III Yay Olimpiya Oyunlarında iştirak edən Azərbaycan idmançılarının şərəfinə “Zəfər günləri” adlı tədbir təşkil edib.
Tədbirdə MOK-un vitse-prezidentləri Çingiz Hüseynzadə və Xəzər İsayev, Komitənin baş katibinin müavini Azər Əliyev və idman federasiyalarının nümayəndələri iştirak ediblər.
Argentinanın paytaxtı Buenos-Ayresdə keçirilmiş Yeniyetmələrin III Yay Olimpiya Oyunlarından bəhs edən videoçarxın nümayişindən sonra çıxış edən Ç.Hüseynzadə ölkəmizdə idmana göstərilən dövlət qayğısından danışıb və atletlərimizin beynəlxalq arenada çıxışını yüksək qiymətləndirib:
"Bu dəfə qazanılan medalların hər biri fərqli idman növü üzrədir. İndiyədək belə nəticə olmayıb. Bu məqam Azərbaycanda idmanın inkişafından, yüksək səviyyədə olmasından xəbər verir".
Sonra Buenos-Ayres 2018-in fəxri kürsüsündə yer alan idmançılara Olimpiya diplomu və xüsusi mükafat verilib. Tədbir bədii hissə ilə davam edib.
Xatırladaq ki, Olimpiadaya 17 idmançı ilə qatılan milli komandamız 2-si qızıl, 1-i gümüş və 3-ü bürünc olmaqla 6 medal qazanıb.