Azərbaycan, Bakı / Trend , müxbir İ.Xəlilova/ Bazar günü Bakıda "Doing Business" hesabatının müəllifi Simeon Cankovun verdiyi məlumata görə, 1,5-2 il ərzində Azərbaycanda 2006-ci ildən 22% səviyyəsində fəaliyyət göstərən korporativ verginin (gəlir vergisi) dərəcəsində növbəti dəyişiklik baş verə bilər.
Gürcüstanda biznesin şərtlərinin sadələşdirilməsi ilə bağlı keçirilən islahatlar zamanı gəlir vergisinin dərəcəsi 20%-dən 15%-ə, vergi növlərinin sayı isə 13-dən 4-də endirilib. Azərbaycanda hazırda 9 vergi növü fəaliyyət göstərir, Vergi Məcəlləsinin qəbul olunmasından 2001-ci ilə qədər isə, 13 vergi növü mövcud olub.
Cankov etiraf edib ki, son illər Azərbaycanda vergi sisteminin sadələşdirilməsi ilə bağlı dinamik islahatlar keçirilib ki, bu da biznesin həyata keçirilməsi üçün vacibdir.
"Bu, Azərbaycanın 2006-ci ildə tutduğu 99-cu yerdən 2007-ci ildə 96-cı yerə yüksəlməsinə səbəb olub. Biz vergi idarəetməsində də irəliləyişlərin əldə olunacağını gözləyirik ki, bu da biznesin başlanması və sərmayəçilərin fəaliyyəti üçün vacibdir" - deyə Cankov bildirib.
Onun sözlərinə görə, hesabatın hazırlanması zamanı Dünya Bankının və Beynəlxalq Maliyyə Korporasiyasının ekspertləri ölkədəki vergi rejimini təhlil edərək, hökumətə tövsiyələr ediblər. İnvestorlar verginin bütün növləri üzrə qeydiyyatdan keçmənin vacibliyi ilə maraqlanıblar. Hesabatın müəllifi qeyd edib ki, Azərbaycanda vergi dərəcələrinin endirilməsi ilə yanaşı, ödəniş prosesi və vergi bəyannamələrinin təqdim olunma mexanizmi də sadələşib ki, bu da vergi daxilolmalarına təsir göstərir.
