Azərbaycan, Bakı/ Trend , müxbir İ.Xəlilova / Sentyabr ayında ərzaq məhsullarının qiyməti avqust ayı ilə müqayisədə 1,5 faiz, qeyri ərzaq məhsulları 0,4 faiz, tarif və xidmətlər 0,7 faiz artıb. Bu barədə çərşənbə axşamı Dövlət Statistika Komitəsindən məlumat verilib. Bunun nəticəsində, istehlak qiymətlərinin indeksi sentyabr ayında 101,1 faiz təşkil edib.
Ay ərzində çörək və makaron məmulatları, uşaq qidaları, ət və süd məhsulları, quş əti. konserv, kolbasa məmulatları, yağ, spirtli içkilər, qənnadı məhsulları, kofe, çay, qənd, meyvə (banan, ərik) və tərəvəzin (kök, çuğundur, pomidor, xiyar, sarmısaq, badımcan, kələm) qiyməti qalxıb. Düyü, un, balıq, limon, alma, armud, üzüm, gavalı, qoz, bibər, soğan və kartofun qiymət isə ucuzlaşıb.