Azərbaycan, Bakı, 14 mart / müxbir İ.Əlizadə/ Respublika prokurorluğu Azərbaycanda insan ölümünə səbəb olan İran istehsalı olan qaz sobalarının ölkəyə hansı yollarla gətirilməsini araşdıracaq.
"Standartlaşdırma , metrologiya və patent üzrə Dövlət Agentliyi qaz sobalarının Azərbaycana hansı yollarla gətirilməsi və sertifikat almadan satışa çıxarılması məsələsinin araşdırılması ilə bağlı sənədləri hazırlayır və həmin sənədlər Respublika prokurorluğuna təqdim olunacaq" - deyə cümə günü jurnalistlərə açıqlamasında "Standartlaşdırma , metrologiya və patent üzrə Dövlət Agentliyinin sədri Ramiz Həsənov bildirib.
Dövlət Agentliyi sertifikatlaşdırmanı iki yolla həyata keçirir - test üsulu və ya istehlakçı ölkənin sertifikatının tanınması yolu ilə. İran istehsalı olan sobaların sertifikatlaşdırılması məcburi olan Azərbaycan hökuməti tərəfindən müəyyən edilmiş siyahıya daxildirlər.
Həsənov qeyd edib ki, qanunvericiliyə görə, Azərbaycana idxal olunan qaz sobaları sertifikatlaşdırılmalıdır. Lakin Azərbaycanda istifadə olunan qaz sobaları heç bir hüquqi prosedurdan keçməyib və sertifikatlaşdırılmayıb.
"Əsas məsələ həmin qaz sobalarının Azərbaycana necə gətirilməsidir", - o bildirib. Onun sözlərinə görə, Dövlət Agentliyi bazarlarda monitorinq aparıb və qaz sobalarının satışına qadağa qoyub.
"Qaz sobalaranıın satışını davam etdirən şəxslər cinayət məsuliyyətinə cəlb olunacaqlar" - deyə Həsənov qeyd edib.
"Azəriqaz" QSC-nin məlumatına görə, yanvarda Azərbaycanda qazla bağlı 40-dan çox hadisə qeyd olunub və nəticədə, 16 nəfər həlak olub, 49 nəfər müxtəlif bədən xəsarəti alıb. QSC-də hesab edirlər ki, hadisələrə səbəb, qaz cihazlarından qeyri-düzgün istifadə və binalarda ventilyasiya ilə bağlı problemlərdir.
Məqalə müəllifinin ünvanı: [email protected]