Azərbaycan, Bakı, 21 may/ Trend , müxbir İ.Xəlilova/ Beynəlxalq Maliyyə Korporasiyası (BMK) tərəfindən təşkil edilən "Daşınmaz əmlakın qiymətləndirilməsinin əhəmiyyəti" beynəlxalq konfransında ipoteka kreditləşməsində daşınmaz əmlakın qiymətləndirilməsi problemləri nəzərdən keçiriləcək. Bu barədə çərşənbə günü BMK layihəsinin maliyyə analitiki Azər Əliyev məlumat verib. Tədbir mayın 26-da Bakıda keçiriləcək.
Onun sözlərinə görə, tədbirdə tənzimlənmə məsələləri, daşınmaz əmlakın qiymətləndirilməsinin güclü və zəif tərəfləri, qiymətləndirmə şirkətlərinin bu sahədə fəaliyyəti nəzərdən keçiriləcək. BMK, Azərbaycanda ilkin mənzil maliyyələşdirilməsi bazarında əvvəllər keçirilən araşdırmalarda qiymətləndirmə fəaliyyətinin lisenziyalaşdırılmasının olmaması ilə bağlı problemin mövcudluğunu qeyd edib. Korporasiyanın ekspertlərinin rəyinə görə, Azərbaycanda rieltor xidmətləri sektoru inkişaf etməyə başlayır. Lakin indiyədək mənzil daşınmaz əmlakı ilə sazişlər üzrə açıq məlumat bazası yoxdur.
Konfransda BMK-nın sərmayə və texniki hissələr üzrə ekspertlərinin, ipoteka bazarı iştirakçılarının, həmçinin, AMB nəzdində fəaliyyət göstərən Azərbaycan İpoteka Fondunun nümayəndələrinin iştirakı gözlənilir.
Hazırda BMK Azərbaycanda təkrar ipoteka bazarının yaradılmasına texniki yardım göstərir. Maliyyə Korporasiyası "Sekyuterizasiya haqqında" qanun layihəsinin hazırlanmasında Azərbaycan Milli Bankına yardım göstərilməsi üçün məsləhətçi cəlb edir. Azərbaycan banklarında sekyuterizasiya üsulu ilə ipoteka kreditləşməsinin tətbiqi dövlət səviyyəsində ümumi Proqramın və Qanunun qəbulundan sonra mümkün olacaq.
Qanunvericiliyin təkmilləşdirilməsi və Azərbaycan İpoteka Fondunun institusional potensialının artırılması üzrə tədbirlər BMK-nın texniki yardım layihəsinin II fazası çərçivəsində aparılır. Layihə İsveçrənin iqtisadi əlaqələr üzrə Dövlət Katibliyi ilə birgə, Maliyyə Korporasiyası tərəfindən maliyyələşdirilir. Regional olması və Mərkəzi Asiya və Azərbaycanı əhatə etməsinə baxmayaraq, SECO-nun vəsaitləri yalnız Azərbaycan üçün nəzərdə tutulub.
Müəlliflə əlaqə saxlamaq üçün elektron ünvan: [email protected]
