Azərbaycan, Bakı, 26 may/ Trend müxbir E.İsmayılov/ Azərbaycanın İqtisadi İnkişaf Nazirliyi (İİN) Fransanın "Lafarge" şirkəti ilə Azərbaycanda sement zavodunun tikintisi layihəsi üzrə danışıqları davam etdirir. Bu barədə bazar ertəsi Azərbaycan iqtisadi inkişaf nazirinin müavini Mikayıl Cabbarov məlumat verib.
Onun sözlərinə görə, "Lafarge" şirkətinə Azərbaycanın qərb regionunda (Tovuz) əhəngdaşı yatağının işlənilməsi təklif edilib. Lakin, şirkət yatağın Abşerona yaxın yerləşməsi arzusunda olduğunu bildirib.
"O zaman Abşeronda dövlət mülkiyyətində olan rentabelli yataqlar tapılmayıb, lakin bu istiqamətdə işlər davam etdirilir", - Cabbarov bildirib.
Abşeronda işlənilməsi 40-50 ilə kifayət edəcək, dövlət mülkiyyətində olan iri əhəngdaşı ehtiyatına malik azad sahələr yoxdur.
Sement istehsalına başlamaq üçün ən azı 100 mln. ton gil və əhəngdaşı ehtiyatına malik olmaq lazımdır.
"Lafarge"nin zavodu tikməyi planlaşdırdığı Qaradağ rayonunda 100 mln. ton ehtiyata malik yataq yoxdur və buna görə də İqtisadi İnkişaf Nazirliyi Qobustandakı yatağı tədqiq etməyi təklif edib.
Hazırda "Lafarge" kəşfiyyat işlərinə başlamaq üçün Azərbaycan tərəfinin Qobustanda ehtiyatın olmasını təsdiqləməsini gözləyir. Şirkət həmçinin Qobustandakı yatağın ehtiyatından istifadə etməklə Qaradağda sement istehsalı üzrə sonrakı işlərin aparılmasının texniki və hüquqi imkanlarına əmin olmaq istəyir.
"Lafarge"nin əsas şərti sement zavodunun Bakıdan 100- 150 km məsafədə tikilməsidir. Belə ki, sement və tikinti materiallarının əsas istifadə bazarı Bakı və Abşerondur.
"Lafarge"nin digər problemi belədir ki, Bakının Qaradağ rayonunda daş karyerlərinin işlədiyi "Güzdək" yatağında zəruri ehtiyatların həcmi az ola bilər. Digər tərəfdən İİN-in proqnozlarına görə, Qobustanda kiçik ehtiyatlar var. Lakin, orada təsdiqlənmiş ehtiyatlar yoxdur və bununla əlaqədar, geoloji kəşfiyyat işlərinin aparılmasına ehtiyac var.
"Lafarge"nin sement zavodu üçün 90 mln. ton gil və əhəngdaşı lazımdır. İlkin olaraq layihə 100-150 mln. avro qiymətləndirilib, lakin zavodun əvvəllər tikintisi planalşdırılan Qazax rayonunda yerləşməsi nəzərə alınmaqla. Zavodun istehal gücü 1 mln. ton civarında olacaq. Sement zavodunun tikintisi layihəsində 20 faiz səviyyəsində Azərbaycan İnvestisiya Şirkətinin iştirakı planlaşdırlır. Qalan hissə isə Lafarge-nin hesabına təmin ediləcək.
Müəlliflə əlaqə saxlamaq üçün elektron ünvan: [email protected]