Azərbaycan, Bakı, 03 iyun / Trend , İ.Xəlilova/ Azərbaycanın Nazirlər Kabineti ünvanlı sosial yardım çərçivəsində ehtiyac meyarını iyulun 1-dən 10 manat artırılması üzrə sərəncam layihəsini hazırlayıb. Bu haqda Baş nazir Artur Rasizadə çərşənbə axşamı bildirib.
"Sərəncam ölkə prezidentinin tapşırığı əsasında hazırlanıb və təsdiq edilmək üçün prezident Administrasiyasına təqdim olunacaq", - deyə hökumət başçısı bildirib.
Onun sözlərinə görə, adambaşına ünvanlı sosial yardımın 45 manatdan 55 manatadək artırılması təklif olunur. Sözügedən qərar, ailə beş nəfərdən ibarət olduğu halda, hər bir ailəyə əlavə 50 manat gəlir əldə etmək imkanı yaradacaq. Hazırda ölkədə 91 min ailə ünvanlı sosial yardım alır.
"Hazırda aztəminatlı ailələr inflyasiya proseslərinə görə, həqiqətən də çətinliklər yaşayır, buna görə də hökumət onlara dəstək üçün ünvanlı sosial yardım sistemindən istifadə etmək niyyətindədir", - deyə hökumət başçısı bildirib.
