Azərbaycan, Bakı, 30 oktyabr/ Trend , müxbir İ.Xəlilova/ Beynəlxalq Valyuta Fondu (BVF) noyabrın 12-dən ölkədə vergi inzibatçılığında islahatların aparılmasına texniki yardım layihəsi üzrə Azərbaycanın Vergilər Nazirliyi ilə məsləhətləşmələri davam etdirəcək, - BVF-nin Bakı nümayəndəliyindən cümə axşamı bildiriblər.
"Oktyabrın 24-dək ölkənin vergi orqanları ilə müzakirələr aparacaq texniki missiyaya Fondun büdcə məsələləri üzrə eksperti Edmun Brayber başçılıq edəcək", - nümayəndəlikdən bildiriblər.
Valyuta Fondunun ekspertləri gələcək tədbirlərin müəyyənləşdirilməsi üçün vergi inzibatçılığı sahəsində 2008-ci ilin avqustunda başlanılmış işlərin təhlilini davam etdirəcəklər.
Hazırda Vergilər Nazirliyi Azərbaycanın Vergi Qanunvericiliyinin Avropa İttifaqının normalarına uyğunlaşdırılması üzrə 2009 - 2012 - ci illərə nəzərdə tutulan Dövlət Proqramını hazırlayır. BVF-nin ekspertləri proqram layihəsinin təkmilləşdirilməsi və onun uğurla realizə edilməsinə kömək edirlər.
Valyuta Fondunun ekspertləri son yeddi -səkkiz ildə vergi sistemində islahatların aparılması prosesində fəal surətdə iştirak ediblər. İslahatlar zamanı vergi informasiya sisteminin avtomatlaşdıırlması yolu ilə nazirliyin bütün strukturları arasında əlaqə təmin edilib. 2007-ci ildən Azərbaycanda Elektron Vergi Bəyannamələri sisteminin tətbiqi başlayıb və qısa müddətdə vergi ödəyicilərinin böyük hissəsi, o cümlədən ƏDV ödəyicilərinin 80 faizi elektron formatda Vergi Bəyannamələrinin təqdim edilməsinə keçib.
Müəlliflə əlaqə saxlamaq üçün elektron ünvan: [email protected]
