Azərbaycan, Bakı, 12 noyabr / Trend / "Azərbaycan yeni Bakı beynəlxalq dəniz ticarət limanının tikintisi çərçivəsində, Beyrut beynəlxalq dəniz limanının təcrübəsindən istifadə etmək niyyətindədir", - deyə Azərbaycan Dövlət Dəniz Administrasiyası rəhbərinin müavini Namiq Ağamalıyev Livanda Panərəb dəniz gəmiçilik palataları Federasiyasının 12 -ci rəhbərlər iclasda iştirakın yekunu üzrə bildirib.
Azərbaycan nümayəndə heyəti bu iclasda Federasiya rəhbəri Hatim Əl-Kadinin xüsusi dəvəti ilə iştirak edib. Görüşdə Livan, Səudiyyə Ərəbistanı, Yəmən, Tunis, Misir və digər ərəb ölkələrinin nümayəndələri iştirak ediblər.
Federasiya rəhbərinin sözlərinə görə, Azərbaycan nümayəndə heyətinin iclasda iştirakı dəniz nəqliyyatı sahəsində hökumətlərarası qarşılıqlı əlaqələrin yaranmasına və onların inkişafının gələcəkdə stimullaşdırılmasına imkan yaradacaq.
İclas zamanı gəmiçilik sahəsində nəqliyyat əməkdaşlığı məsələləri və bu sahədə mövcud problemlər müzakirə olunub.
