Azərbaycan, Bakı, 15 noyabr / Trend , müxbir S.Babayeva/ "Quş qripi" təhlükəsilə bağlı 2008-ci ildə keçiriləcək sayca beşinci monitorinq dekabrın 15-də başlayacaq, - şənbə günü Kənd Təsərrüfatı Nazirliyi yanında Dövlət Baytarlıq Xidmətindən deyiblər.
"Bu qərar köçəri quşların məhz bu aya təsadüf edən miqrasiyası ilə bağlıdır", - Baytarlıq Xidmətindən bildiriblər.
Monitorinq Abşeron yarımadasını və ona yaxın əraziləri, Xəzərsahili zolağa daxil olan Dəvəçi, Salyan, Ağcabədi, Lənkəran bölgələrini əhatə edəcək və onu Səhiyyə, Kənd Təsərrüfatı, Ekologiya və Təbii Sərvətlər nazirlikləri nümayəndələrindən və Ovçular Cəmiyyəti üzvlərindən ibarət xüsusi İşçi qrup keçirəcək.
Bütövlükdə 2008-ci il ərzində keçirilən beş monitorinqdə vəhşi quşlardan və ev quşlarından 8 mindən artıq qan və patoloji material nümunəsi götürülüb.
Ötən il Dövlət Baytarlıq Xidmətinin keçirdiyi 12 monitorinq zamanı 8 min vəhşi quş və ev quşu müayinə olunub. Onların heç birində virus aşkar olunmayıb.
Məqalə müəllifilə əlaqə ünvanı: c [email protected]