Azərbaycan, Bakı, 25 noyabr/ Trend , müxbir İ.Xəlilova/ "Azərbaycan Milli Bankı (AMB) 2008 - ci ilin sonunadək sərəncamında olan valyuta ehtiyatlarının 5,6 -5,7 mlrd. dollaradək artacağını gözləyir", - AMB İdarə Heyəti sədrinin müavini Aftandil Babayev çərşənə axşamı bildirib.
"Valyuta ehtiyatlarını idarə edərkən, biz daha mühafizəkar siyasət seçmişik və üç prinsipə əsaslanırıq - təhlükəsizlik, likvidlik və gəlirlilik. Lakin birinci yerdə onların təhlükəsizliyinin təmin edilməsi dayanır", - Babayev bildirib.
Onun sözlərinə görə, daha çox təhlükəsizliyin təmin edilməsi üçün AMB - nin valyuta ehtiyatları ABŞ Federal Ehtiyat Sisteminin (ehtiyatların dollar hissəsi) hesablarında, Böyük Britaniya Mərkəzi Bankında (funt - sterlinq hissəsi) saxlanılır. Avropa valyutasında olan ehtiyatlar daha davamlı kontragentlərdə yerləşdirilib.
Belə siyasət ilin əvvəlindən 152 mln. dollar əlavə gəlirlilik almağa imkan verib.
Babayevin sözlərinə görə, son aylar valyuta ehtiyatlarının həcmində dəyişikliklər və onların bir qədər azalması yeni ehtiyatların idarə edilməsi strategiyasının təsiri ilə izah olunur. 2007 - ci ilin sonundan başlayaraq, valyuta ehtiyatları portfeli əməliyyat və sərmayə hissəsinə ayrılır. Əməliyyat hissəsi pul və məzənnə siyasəti, ticarət balansı çərçivəsində əməliyyatlara tez reaksiya göstərmək məqsədilə, qısamüddətli idarəetmə üçün mənbə kimi çıxış edir. Ehtiyatların sərmayə hissəsi daha uzunmüddətli idarəetməyə verilir.
[Sentyabrın 30 - na ölkənin valyuta ehtiyatları 5438,6 mln. dollar təşkil edirdisə, oktyabrın 31-nə 2,1 faiz (122,6 mln. dollar) azalaraq, 5316 mln. dollara bərabər olub.]
Bank rəsmisinin sözlərinə görə, valyuta ehtiyatlarının dinamikasında dəyişkənliyin ikinci səbəbi valyuta portfelində ehtiyatların diversifikasiyası olub. Hazırda portfelin 60 faizi dollarda, 30 faizi avroda, qalan hissəsi funt-sterlinqdə yerləşdirilib.
"Valyuta ehtiyatlarının statistik uçotu dollarda aparıldığından, müvafiq olaraq, dünya prosesləri fonunda valyuta məzənnələrinin dəyişməsi də AMB - nin ehtiyatlarının dinamikasına təsir göstərir", - Milli Bank İdarə Heyəti sədrinin müavini əlavə edib. Bununla əlaqədar, o, valyuta ehtiyatlarının azalmasınıdan danışmağı düzgün hesab etmir. Belə ki, ilin əvvəlinə ehtiyatlar 4015 mln. dollar təşkil edirdisə, hazırda 5270 mln. dollara çatır.
Babayev ilin sonunadək ehtiyatların artacağını gözləyir ki, bu da ilin sonuna büdcə xərclərinin artması ilə əlaqədar, əlavə müdaxiləyə zərurətlə bağlıdır. Müvafiq olaraq, dövlət xərclərinin valyuta komponentinin konvertasiyasına tələbat yaranacaq. AMB -nin proqnozlarına əsasən, 2008 - ci ilin yekunlarına görə, valyuta müdaxiləsi həcminin 2 mlrd. dollara çatacağı gözlənilir. İlin əvvəlindən AMB ölkənin valyuta bazarından 1,6 mlrd. dollar məbləğdə valyuta alıb.
Bu gün ölkənin strateji valyuta ehtiyatları 18,2 mlrd. dolları ötür.
Müəlliflə əlaqə saxlamaq üçün elektron ünvan: [email protected]